COVID-19: Mizoram dinhmun ; Hripui vei 1,294 hmuh belh a ni

September 22, Nilaini khan Mizoramah swab sample 8,396 endik aṭangin Covid-19 vei 1,294 hmuh chhuah a ni a, India rama hripui vei hmuh thar tam lamah state palina a ni. Nimin khan hripui vei dam tawh mi 678 chhuahtir an ni a, hripui vangin mi paruk an thi.

Covid-19 vei hmuh tharte chu mipa 601 leh hmeichhia 693 an ni a; ZMC laboratory-a hmuh chhuah 356, TrueNAT-PCR hmanga hmuh 46, RAT hmanga hmuh 868 leh Fluorescent Immu­noassay (FIA) hmanga hmuh 24 an ni.

IDSP record angin, Mizoramah Covid-19 vei 84,109 hmuh chhuah a ni tawh a, mipa 41,972 leh hmeichhia 42,137 an ni. Nimin tlai dar 5 thleng khan mi 68,877 (81.89%) chhuahtir an ni tawh a, mi 278 (0.33%) thi tawhin, enkawl mek mi 14,954 (17.78%) an awm.

September 22, Nilainia Covid-19 vei hmuh thar mi 1,294-te chu symptom nei 662 leh nei lo 632 an ni a; tualchhunga kái 1,292 leh tun hnaia state pawn aṭanga rawn lut pahnih niin, tualchhunga kái zingah kàina chin hriat loh 484 an awm.

Hripui vei hmuh thar mi 1,294 zingah nausên kum khat tling lo 15 an tel a, an zingah symptom nei pakua an awm a; a naupang ber thla khat mi pawhin symptom a nei. Kum 70 chung lam mi 38 aia tlem lo awmin, an zinga 23-in symptom an nei a, a upa ber chu kum 91 a ni.

Nimin zinga Covid-19 positive result tihchhuah a nih hnuah Mizoramah hripui vei enkawl mek (active case) mi 15,638 an awm a, an tam lai ber a ni. Mizoram aia active case tamna state pathum - Kerala (mi 1,61,596), Maharashtra (43,544) leh Tamil Nadu (17,027) chiah a awm. Covid-19 vei September 22-a hmuh chhuah zatah Mizoram chu state 28 leh UT pariat zingah pangana a ni bawk.

Hmarchhak state pariat bikah Mizoram chu Covid-19 vei hmuh chhuah tawh zat tam lamah pathumna a ni tawh a, Assam leh Manipur-ah chiah an tam zawk tawh a ni. September 22, Nilaini khan hmarchhak state-ah Covid-19 positive mi 2,205 hmuh chhuah a ni a, chu'ng zinga 1,294 (58.68%) chu Mizorama hmuh chhuah niin, NE state dang pasariha hmuh zat belh khawm aiin Mizorama hmuh chhuah 383-in a tam zawk.
Nimin chawhma lam dinhmun angin, NE state pariatah Covid-19 vei enkawl mek mi 26,489 an awm a, chu'ng zinga mi 15,638 chu 59.04% chu Mizorama mi an ni a; hmarchhak state dang pasariha active case zat belh khawm 10,851 aiin Mizorama active case 15,638 chu 4,787-in a tam zawk a ni.

September thla ni 22 chhungin hripui vei mi 24,109 hmuh a ni tawh a, chawhrualin ni tin mi 1,095.86 hmuh chhuah an awm ziah ang a ni. Kum 2011 chhiarpui aṭanga chhûtin Mizorama Covid-19 vei hmuh tawh 82,815 chu mi 1,000 zelah hripui vei mi 77 an awm ang a ni a; mi 1,00,000 zela Covid-19 vangin mi 24 an thi tawh ang a ni.

Nimin khan tlai dar 5 thlengin hripui vei dam tawh mi 678 chhuahtir an ni a; Aizawl district-ah mi 297, Lunglei district-ah 167, Kolasib district-ah 97, Mamit district-ah 86, Hnahthial district-ah 17, Champhai district-ah 13 leh Saitual district-ah pakhat an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh zinga mi 79,624 chu Mizoram chhunga kái chhâwng an ni a, mi 4,485 chu Mizoram páwn aṭanga an rawn luh hnua hmuh chhuah an ni.