Mirethei thleng phâk sorkar neih Mizoramin a mamawh - BJP President

BJP, Mizoram Pradesh chuan nimin khan West Lungdar Village Task Force hnenah Covid-19 dona hmanraw chi hrang hrang an pe a, BJP president Vanlalhmuaka'n West Lungdar VTF chairman Sikulthara hnenah a hlan. Vanlalhmuaka chuan, PM Narendra Modi anga miretheite thleng phâk sorkar neih ve Mizoramin a mamawh thu a sawi.

Vanlalhmuaka chuan, Mizoram sorkarin mipui chu lockdown rei ber a puan khum tih sawiin, "Mizorama khaw tin mai nunphung a buai hle a, eichawp zawng tan phei chuan dam khawchhuah dan tur ngawr ngawr ngaihtuah a ngai ta hial. Sorkarin lockdown rei ber min puan khum a, Covid vanga eichawp zawng, miretheite buh zém erawh an ngaihthah hle thung. Anmahni pum puarna leh inthlan leh hun atana campaign-na tur ni àwm takin an hlâwkna tur chiah an ngaihtuah niin a lang," a ti.

Mizoram BJP President chuan, "Mizoram Health Minister-in Delhi-a a zin chángin Union Minister hnenah ZMC tihchangtlunna te, in sakna tur an mahni hlâwkna awm thei tur ang chauh mai an zuk dil ṭhinte chu Union Minister-te mak tih a ni," a ti a; Mizoramah BJP telna sorkar a ding a nih chuan Reiek kawng chu double lane-a an siam tur thu a sawi bawk.