Covid-19 vangin niminah mi 6 an thi

Covid-19 vangin nimin khan tlai dar 5 thlengin mi paruk an thi. Sorkar chhinchhiah angin, nimin tlai dar 5 thleng khan Mizoramah Covid-19 vangin mi 278 an thi tawh a, September thla bikah mi 61 thi tawhin, thi an tam ber thla a ni tawh.

Covid-19 vei enkawl lai Zopari (70), Lawngtlai AOC Veng chu nimin zing dar 1:30 khan Lawngtlai District Hospital (dedicated covid health centre)-ah a thi. Covid-19 vei a ni tih September 18 khan hmuh chhuah a ni a, DCHC-ah enkawl nghal a ni.

B Vanlallawma (48), Lawngtlai New Vengpui pawh nimin zing dar 4:40 khan hripui vangin Lawngtlai DCHC-ah a thi. Covid-19 positive a ni tih September 17 khan hmuh chhuah niin, CCC-ah enkawl a ni a, September 21 aṭangin DCHC-ah enkawl a nih thu sorkar thuchhuakin a tarlang.

Nimin zing dar 5:30 khan Lalrinliana Chhangte (35) s/o C Roṭhuama, Ramhlun North chu hripui vangin State Referral Hospital (ZMC)-ah a thi. Covid-19 positive a ni tih September 12-ah hmuh chhuah niin, September 15 aṭangin SRH-ah enkawl a ni a, natna dang nei sa a ni.

Ramhlun North mi vêk F Lalṭanpuii (50) w/o Lalthlanmawia pawh nimin zing dar 5:50 khan hripui vangin SRH-ZMC-ah a thi. Covid-19 vei a ni tih September 13-ah hmuh chhuah niin, SRH-ah enkawl nghal a ni a, cancer a vei tel a ni. Lalrinliana leh Lalṭanpuii te hi nimin chhun khan a rualin RSC Field, Ramhlun North-ah vui an ni.

Nimin chhun dar 12:30 khan K Sainawla (75), Lunglei Electric Veng chu hripui vangin SRH-ZMC-ah a thi a, natna dang nei sa a ni. Covid-19 positive a ni tih September 15-ah hmuh chhuah a ni a, September 19 khan SRH-ah dah luh a ni tih sorkar thuchhuakin a tarlang.

Lalthankima (59), Lawipu pawh nimin tlai dar 3:10 khan hripui vangin SRH-ah a thi a, hripui vanga thi 278-na a ni. Covid-19 vei a ni tih September 7-ah hmuh chhuah niin, SRH-ah dah luh nghal a ni a, natna dang nei sa a ni.

September 22, Nilaini zan khan hripui vangin mi pahnih an thih belh bawk a, September 22-a thite chu mi pali an ni. Remruatpuia (16) s/o MS Laldawngliani, Serchhip Ramthlun Veng chu Nilaini zan dar 8 khan SRH-ZMC-ah a thi a, Covid-19 vei a ni tih September 10-ah hmuh chhuah niin, September 12-ah SRH-ah dah luh a ni a, kal natna nei sa a ni.

Lalduhthangi (79), Kulikawn pawh September 22 zan dar 10:30 khan SRH-ah a thi. Covid-19 positive a ni tih September 21-ah hmuh chhuah niin, a tûk September 22 khan SRH dah luh a ni a, natna dang nei niin, SRH-ah dah luh a nih ní-ah a thi a ni.