AB-PMJAY hnuaiah damlo inenkawlna senso Rs. 47,14,79,621 pe chhuak tawh

Damlote'n a thlàwna damdawi-ina an awmna senso an hmuh lêt theihna Ayushman Bharat-PMJAY kum thum tlin pualin nimin khan Taxation Auditorium-ah AROGYA Manthan 3.0 hman a ni. Mizoramah AB-PMJAY kalpui a nih aṭanga March 31, 2021 thleng khan damdawi-ina inenkawlna senso Rs. 47,14,79,621 pek chhuah a ni tawh.

AROGYA Manthan 3.0 hmannaa khuallian Health secretary R Lalramnghaka chuan, Mizoram sorkarin mipui hriselna a ngai pawimawh hle nia sawiin, "Dam loh nikhuaa mipui inenkawlna senso bill let kawngah theihtawp a chhuah mek zel a ni," a ti.

Health Secretary chuan, India ram state tê zingah Aizawl Civil Hospital chu claim submission-ah ti ṭha ber dawttu a nih thu a sawi a; AB-PMJAY la hmelhriat mumal lote tan ngaihtuahna sénga ngaihven thar leh tur leh hmasawn zel turin thawktute a chah. Health Secretary hian AB-PMJAY enkawl kawnga ti ṭhate hnenah lawmman a sem a ni.

AB-PMJAY kum thum tlin lawmna hi Mizoram State Health Care Society principal executive officer Dr Chawngthanchhunga'n a kaihruai a, MSHCS chief executive office Dr Biakthansangi'n Mizorama AB-PMJAY kalpui dan a sawifiah.

AB-PMJAY hi October 1, 2018 aṭangin Mizoramah hman a ni a; scheme-in a huam chin Socio Economic Caste Census 2011 deprive list-a awm chhungkua, golden card leh PM letter nei damlote'n kum tin Rs. 5,00,000 thleng senso an hmu lêt thei a ni.

Covid-19 vei damlo, damdawi-ina inenkawlte tan pawh AB-PMJAY zawm damdawi-ina an awm chuan hman theih a ni a, covid care centre leh community covid care centre awmte tan erawh chuan empanelled hospital a nih loh avangin hman theih a ni lo. April 2020 aṭanga nimin thleng khan Mizoramah Covid-19 vei mi 245-in AB-PMJAY hi an hmang tawh a ni.