CYMA-in CADC zir chiangtu tur Study Group an din

YMA Central Exe­cutive Committee (CEC) chu April 14, Inrinni khan Central YMA Co­mmi­ttee Room-ah an ṭhu a; YMA General Confe­rence-a rel tawh Chakma Autonomous District Council (ACDC) ṭhiah chungchangah, lehkha pawimawhte leh ṭul dangte la khawma zir chiangtu tur Study Group an din.

CADC Study Group-ah hian convener chu CYMA president Vanlal­ruata a ni a, member-te chu Dr Malsawmliana, Prof. Lalnuntluanga leh Lalrinmawia, CEC member vekte an ni.

YMA CEC chuan, Aizawl khawpuia in sak nana hmun rem lo leh hlauhawm nia ngaihahte Aizawl Municipal Corpo­ration-in in sak phal­na a pek loh nan leh a pek tawhte pawh a ṭul anga ennawn a nih theih nan a zir chiangtu tur Study Group an din bawk a; convener chu Lalhma­chhuana, general secre­tary a ni a, David Lal­nunkima, Vanlalruata leh BC Tawna te member an ni.

Central YMA chuan, PWD leh CYMA-te'n Mizorama kawngpui ṭha a awm theih nana MoU siam tura duan, draft MoU an enho a; hun remchang hmasa berah MoU chu sign theih turin an pawm. Mipuiin ration buhfai bûk dik tak an dawn theih nan hmalak an rel a, a bul ṭan nan April 20, 2018-ah Aizawla buhfai retailer zawng zawng koh kawma sawipui an rel.

April 26, 2018-ah Chawngte leh Tlabungah YMA kumpuan 'Ram leh hnam humhalh' pualin hun hman an rel bawk.