Mizoram sorkarin Covid-19 bakah Opposition leh RT-PCR a do - Duhoma

ZPM leader Lalduhoma, MLA chuan, Mizoram sorkarin thil pathum - Covid-19, eptu páwlte leh RT-PCR kháwl an do niin a sawi a; dik lohna donaa a hmahruaitua ṭang ngam turin mipui a chah.

Nimina Kawnpuia ZPM-in an party zawm tharte an lawm luhnaah thu sawiin Lalduhoma chuan, "Mizoram sorkar hian Covid-19 chang a do lo a, opposition party a do a, RT-PCR khawl a do bawk. RT-PCR phei hi chu a hlauhin a hlau a ni," a ti.

ZPM Leader sawi danin, India Formosa Foundation (IFF)-in Mizoram sorkar hnenah RT-PCR khawl leh laboratory awmna lirthei (RT-PCR mobile van) pek an tum a, June 15, 2021 khan Health Minister office-ah kalin mi pawimawh dangte awm laiin an inkâwm. Mizoram sorkar aiawhte'n RT-PCR lab. enkawl hautakzia an sawi a, indàwr leh turin an inthlah a, mahse, Mizoram sorkarin a dawr zui lo.

RT-PCR mobile van chungchang chu Chief Minister-in tlai khaw hnuah hriain a bawhzui nghal a, mahse, India ram chu tunah chuan Covid-19 vei tamna ram a nih tawh loh avangin IFF-in a thlàwna pek an tum zingah a tel tawh lo a ni.

Lungleiah sorkarin RT-PCR khawl a bun duh loh thu sawiin Lalduhoma chuan, "Eptu pawlte tih ni miah loin Lunglei mipuiin sorkar an nawr a, High Court-ah hial an luhpui. Court thu pawh zâwm duh loin, contempt of court hial ngai khawpin RT-PCR khawl bun an hreh a ni," a ti.

ZPM Leader chuan, Lunglei district-a MLA-te chu mipui tana au chhuak ngam loah a puh a, "Pakhat mah an au chhuak ngam lo. Chief Minister hnena thlen ngam pawh an awm lo, an ngam hlawl lo," tiin, a dem thu a sawi.

RT-PCR hmang loa Rapid Antigen Test hman chu mi ṭhenkhatin an hlâwkpui tih sawiin Lalduhoma chuan, "RAT hi a hlâwk a ni," a ti a; RAT kit supply-tu lamin an hlâwkpui a, chutih laiin, mipuiin RAT-a innghah chu an tuar mek tih a sawi bawk.

Lalduhoma chuan, ZPM party-in an MLA an chàn avangin Tuirial bialah by-election neih a ṭul ta tih sawiin, "Lusún chungin bial mipui hmaah kan lo ding ta a ni. Dik lohna do ngam turin a hmahruaituah keini hi kan ṭang ngam tur a ni," a ti.

ZPM chu mi beidawng kal khawm an ni lo a, party pahnihte'n Mizoram an hruai tawhnaa duh khawp hmu lo, ram rorelna ṭha zawk siam beisei tlattute kal khawm an nih thu sawiin ZPM Leader chuan, "Mipui kan tibeidawng ve thiang lo," a ti a; kut hnathawktute thar chhuah hralhna an buaipui nasat dawn thu a sawi.

MLA Dr Vanlalthlana pawhin thu sawiin, hripui len hmain MNF sorkarin SEDP aṭanga Agriculture department dawn let thum chuang Sports department-ah an hmang tih a sawi a, "PWD hnuaiah restricted tender an pek zat chu cheng nuai 44,700 vel a ni a, mi 40 tling loin an insem a, mi 20-in nuai 44,000 an chang. PHE, PE, UDPA leh department dang hnuaiah restricted tender bakah, tender loa contract pek a tam lutuk," a ti.

ZPM thuchhuah chuan, Lalduhoma hian ZPM-ah mi 182 a lawm lut niin a tarlang.