DC-te'n ráltlânte mamawh an la rawn thlen thei lo - CM

Steering Committee for Myanmar (SCM), Lunglei hruaitute chuan nimin khan chief minister Zoramthanga a pisaah hmuin, Myanmar ráltlânte chungchang an sawipui. Chief Minister chuan, ráltlânte mamawh leh dinhmun DC-te'n sorkarah an thlen theih loh thu a sawi.

CM Zoramthanga chuan, sorkarin ráltlânte tana duh anga hma a lâk chak theih loh chhan sawiin, "A mawhphurtu DC-te ka dâwp chhuak thei lo a ni. Ráltlânte dinhmun leh mamawhte ka hnena thlen tura vawi tam ka tih hnuah pawh DC-te'n an la thlen thei tlat lo. Sorkar ang chuan DC-te hi kan rinráwl ber an nih a ngai si a, anni'n report min pek theih si loh avangin hmalak dan thiam a har," a ti.

Ráltlânte chungchang sorkar laipuiah thlena bawhzui reng a nih thu sawiin Zoramthanga chuan, refugee status-a dah dan tur leh sorkar laipui aṭanga ṭanpuina chungchanga a kalphung tur ngaihtuah mek a nih thu SCM hruaitute a hrilh.

Chief Minister chuan, sorkarin ráltlânte a theih ang tâwka a ngaihven thu sawiin, "Thla hmasa khan ráltlânte tan Rs. 3,00,000 sorkarin a lo séng tawh a, tunah hian Rs. 5,00,000 a ruahman leh tawh," a ti.

SCM hruaitute'n CM Relief Fund aṭanga ráltlânte ṭanpui dan a awm theih leh theih loh zawhna chhangin CM chuan, "CM Relief Fund hi kum khat chuang a lut tawh a, tunah hian Rs. 20,000 chuang âwrh chauh a awm," a ti a; tuna CMRF-a awm chu Covid-19 atana hman tur a nih avangin hmun danga hman a rem loh thu a sawi.

Thingsai khua leh a chhehvela ráltlân awmte'n tui thianghlim in tur an neih vat theihna atana tui laksak thuai a ṭul thu SCM hruaitute'n an sawi chungchangah Chief Minister chuan, tihhlawhtlinsak ngei a tum thu a lo hrilh.

SCM hruaitute hian Chief Minister hi March 2021 aṭanga Myanmar aṭanga Mizorama ráltlân rawn lutte undivided Lunglei district chhung hmun hrang hranga mite an lo buaipui tawh dan leh tun thlenga ráltlânte dinhmun leh harsatnate an sawipui a ni.