MPCC-in an mawhphurhna hlen zo loah Dr Thangtea leh Dr Thiamsanga an puh ; Covid-19 donaah CM sawiselna tur an la hre lo

Mizoram Pradesh Congress Committee (MPCC) Media depart­ment chuan nimin khan Aizawl Press Club-ah thuthar thehdarhtute an kâwm a; Health minister Dr R Lalthangliana leh Covid-19 Medical Opera­tion Team chairman Dr ZR Thiamsanga, MLA chu an mawhphurhna hlen zo loah an puh. Chief minister Zoramthanga erawh chu Covid-19 donaah sawiselna tur an la hre lo.

MPCC Media chair­man Dr Lallianchhunga chuan, September 23, 2021 thlengin Mizoramah Covid-19 vangin mi 281 an thi tawh tih sawiin, "Keini aia state lian leh a lêt za tam mihring tamna state nen hripui vei enkawl zat kan intluk thuak tawh. Vawiin hian India ramah Covid-19 vei hmuh tam lamah leh a vei enkawl zat tam lamah India ramah palina kan ni mek," a ti a; Mizoram chu hmarchhak state zingah Covid-19 vei hmuh thar tam lamah a sàn fâl thu a sawi.

Mizoram dinhmun a ṭha lo chungin Health Minister-in, 'India ram state dangte aiin Covid-19 vanga boral kan la tlem,’ tiin Mizoram chu hripui do hlawhtling ber state-ah a la sawi zel nia sawiin Lallianchhunga chuan, "Sorkar laipui duh dan zâwm loin RT-PCR aia rintlak loh zawk RAT an hmang nasa a, hei hian result dik lo a pe nasa tih a chiang. RT-PCR laboratory bun belh kawngah sorkar a che muang hle," a ti.

Dr Lallianchhunga chuan, Covid-19 thawh thumna thleng tura inbuatsaihna atana district hospital tinah RT-PCR lab. din turin July 21, 2021-ah ngenna an thehlut a, ngaih pawimawh a hlawh lo tih sawiin, "Awmze nei zawka Covid-19 kan do theih nan district tinah a rang thei ang bera RT-PCR lab. din turin MNF sorkar kan ngen nawn leh a ni," a ti a; district tina RT-PCR lab. din chu Covid-19 third wave atana inbuatsaihna tura tihmâkmawh a nih thu a sawi.

Assembly session zawhna leh chhannaah Health Minister-in kal ngaihna a hre tawh lo nia a lan thu sawiin Lallianchhunga chuan, "September 7-9, 2021-a session-ah khan mipui aiawh MLA-te'n zawhna an thehluh zingah chhanna a pek theih loh 36 a awm. Ṭhenkhat chu hripui donaa sorkar inbuatsaihna leh Covid-19 dona atana sum hman dan chungchangte a ni a, Health Minister berin chhànna a pe thei tlat lo," a ti.

MPCC Media hotute chuan, session zawhna chhannaa a lan danin, Mizoram State Health Care Scheme hnuaiah damlo enkawlna senso (bill) táng cheng vbc. 44.21 a awm mek thu sawiin, "Covid-19 vanga lockdown a rei avangin chhungkaw tam tak sum lak luhna a chhia a, an dam lohna bill thlenga batsak an ni leh zel hi sorkarin a rang lamin chinfelsak turin kan ngen a ni," a ti a; bill la thei lo chhungkaw tam tak mangangin an awm mek niin an sawi.

Dr R Lalthangliana leh Dr ZR Thiamsanga te chu hripui donaa an hlawhchham chian hle laiin, an sumdawnna tur in sak tharah an hlawhtling hle nia sawiin MPCC Media chuan, "Health Minister-in home stay tur building lian tak a sa zo dêr tawh a, hman ní lawka Best Citizens of India Award dawngtu Dr ZR Thiamsanga pawhin BN Hospital Nursing School tur Hualngohmunah Aizawl-Lunglei World Bank road nêk chêpin a sa mek a ni," an ti.

MPCC Media hotute chuan, hriselna lam enkawltu pahnih Dr R Lalthangliana leh Dr ZR Thiamsanga te chuan an mawhphurhna an hlen zo lo tih pawm se an duh thu sawiin, "Mi thar chak zawk, rilru leh tha thara hripui do thei tur hnenah an mawhphurhna hi hlàn mai turin kan ngen nawn leh a ni," an ti a; mawhphurhna an hlen ṭhat loh avanga mipuiin an tawrh nasat hmain mipui ṭhat tlànna ber tura hma la tura CM pawh an ngen thu an sawi bawk.

Zawhna chhangin MPCC Media hotute chuan, chanchinbu aṭanga an hmuh danin, CM-in Covid-19 dona atan sum a pe chhuak ṭha tih an sawi a, "Chuti chungin, chawpchilh taka audit-te an ngai. Covid-19 do kawngah CM chu sawiselna tur kan la hre lo," an ti.