Sept. 23: Covid-19 vanga thi tam ber ní

Nimin khan tlai dar 5 thlengin Covid-19 vangin mi pathum an thi. September 23, Ningani khan zan lamah mi pali an thi a, khaw en laia thi mi parukte nen September 23-a thi zawng zawng chu mi 10 an ni a, hripui vanga thi an tam ber ní a ni.

Sorkar chhinchhiah angin, nimin tlai dar 5 thleng khan Mizoramah Covid-19 vangin mi 285 an thi tawh a, September thla bikah mi 68 thi tawhin, thi an tam ber thla a ni tawh.

September 23 zan dar 6:30 khan R Laithanga (76), North Vanlaiphai chu Serchhip DCHC-ah a thi a, Covid-19 positive a ni tih September 17-ah hmuh chhuah niin, DCHC-ah enkawl nghal a ni. Zan dar 7:10-ah Lalrammawia (62), Hauruang, Lunglei district chu Lunglei Pukpui DCHC-ah a thi a, Covid-19 vei a ni tih September 14-ah hmuh chhuah niin, DCHC-ah dah luh nghal a ni.

Zan dar 8-ah K Lalhmangaiha (70), Edenthar Veng chu hripui vangin an inah a thi a, hripui vei a ni tih September 22-ah hmuh chhuah a ni. N Beisa (62), Siaha pawh zan dar 11:55-ah Lunglei Pukpui DCHC-ah a thi a, September 20 khan Covid-19 vei a ni tih hmuh chhuah a ni. September 23 zana thi mi palite hi natna dang nei sa vek an nih thu sorkar thuchhuakin a tarlang.

Nimin chawhma dar 10:30 khan C Lalramhluna (52) h/o Thangfeli, Tuithiang Veng chu hripui vangin State Referral Hospital-ah a thi. Hripui vei a ni tih September 22 khan hmuh chhuah niin, SRH-ah enkawl nghal a ni a, thisen sang leh zunthlum nei sa a ni.

Laltlanhlui (30), Durtlang Leitan chu nimin chhun dar 12 khan hripui vangin SRH-ZMC-ah a thi a, natna dang nei sa a ni. Covid-19 positive a ni tih September 23, Ningani khan hmuh chhuah a ni a, DCHC (MRB Building) aṭangin zanah SRH-ah sawn a nih thu sorkar thuchhuakin a tarlang.

Nimin chawhnu dar 2:30 khan Nupeni (44), New Siaha West pawh hripui vangin Siaha DCHC-ah a thi a; Covid-19 positive a ni tih September 22 khan hmuh chhuah niin, September 23 khan DCHC-ah dah luh a ni a, hripui vei a ni tih hmuh aṭanga ni hnihnaah a thi a ni.