PUC adopted village thar Khawrihním

Pachhunga University College (PUC) chuan khaw chuam (adopted village) atana Khawrihnim an thlan pualin nimin khan Khawrihnim community hall-ah khaw chuam hawnna hun an hmang a, School Education minister Lalchhandama Ralte-in a hmanpui.

Lalchhandama Ralte chuan, Khawrihnim khuain zirna an dah pawimawh tih sawiin, "Zirna dah pawimawh khua apiang an dingchhuak dawn a, PUC-in adopted village-a an thlang hi a inhmeh hle a ni," a ti a; sorkarin zirna a ngaih pawimawh thu leh hripui karah zirtirtu indaih lohna a theih ang anga sukiangin, sikul building ṭha lo eng emaw zat thawm ṭhat a nih thu a sawi.

Minister hian Khawrihnim H/S choka sak nan Rs. 1,00,000, middle school leh YMA hnenah computer leh printer, sikul dangte hnenah infiamna hmanrua a pe a; primary school hnenah special trainner aṭangin zirtirtu pahnih a pek tur thu a sawi bawk.

PUC hian kum 2013 aṭangin adopted village an kalpui ṭan a, Phulpui, Lungleng leh Dulte khuate an lo thlang tawh. Adopted village hi PUC-a zirtirtute sum thawh khawm hmanga kalpui a ni a, zirtirtu leh department-te'n an thiamna zâwn ṭheuhah Khawrihnim khua an zir chiang dawn a ni.