Covid vei hmuh thar leh enkawl mek Tam lamah India-ah Mizoram palina
September 23, Ningania India rama Covid-19 vei hmuh chhuah tharah state 28 leh union territory pariat zingah Mizoram aia hmuh chhuah tamna state pathum chiah a awm a; chu'ngte chu - Kerala-ah mi 19,682, Maharashtra-ah mi 3,320 leh Tamil Nadu-ah mi 1,745-te a ni.
Nimin zinga Covid-19 positive result tihchhuah a nih hnuah Mizoramah hripui vei enkawl mek (active case) mi 15,752 an awm a, an tam lai ber a ni. Mizoram aia active case tamna state pathum - Kerala (mi 1,60,616), Maharashtra (42,753) leh Tamil Nadu (17,121) chiah a awm.
Hmarchhak state pariat bikah Mizoram chu Covid-19 vei hmuh chhuah tawh zat tam lamah pathumna a ni tawh a, Assam leh Manipur-ah chiah an tam zawk tawh.
September 23 khan hmarchhak state-ah Covid-19 positive mi 2,261 hmuh chhuah a ni a, chu'ng zinga 1,257 (55.59%) chu Mizorama hmuh chhuah niin, NE state dang pasariha hmuh zat belh khawm aiin Mizorama hmuh chhuah 253-in a tam zawk.
Nimin chawhma lam dinhmun angin, NE state pariatah Covid-19 vei enkawl mek mi 26,546 an awm a, a hma ni aiin a tlem zawk. Active case 26,546 zinga mi 15,752 (59.34%) chu Mizorama mi an ni a; hmarchhak state dang pasariha active case zat belh khawm 10,794 aiin Mizorama active case 15,752 chu 4,958-in a tam zawk a ni.
Nimin zinga tarlan angin, hmarchhak state zingah Covid-19 vanga thi thar Assam-ah an tam ber a, mi 10 an thi. Mizoramah mi pakua an thi a, Manipur leh Nagaland-ah mi pahnih ve ve an thi a; Meghalaya leh Sikkim-ah mi pakhat ve ve an thi bawk. Arunachal Pradesh leh Tripura-ah thi an awm lo.
Covid-19 lèn tirh aṭangin hmarchhak state zingah Mizoram chu hripui vanga thi tlemna ber a ni reng a, September 23 aṭangin thi tlemna ber chu Arunachal Pradesh a ni tawh a, Mizoramin a dawt. Covid-19 positive hmuh tawh zat aṭanga mitthi zat percentage-ah erawh chuan Mizoram a la hniam ber (0.33%) zui zel thung.