KHAWTHLIR

Thisen pe
Salvation Army Youth, Central North Division chuan nimin khan Aizawl Bazar Corps-ah thisen pek an huaihawt a, Aizawl Civil Hospital blood bank tan thisen unit 73 an pe a, petute mipa 63 leh hmeichhia 10 an ni. NSS Day lawm nan Kolasib College NSS unit-in Kolasib Blood Bank-ah thisen unit 29 an pe a, petute mipa 21 leh hmeichhia pariat an ni a; Serchhip College NSS volunteer-te'n thisen unit 19 leh Mamit HSS NSS volunteer mipa 11 leh hmeichhia palite'n Mamit Blood Bank-ah unit 15 an pe bawk.

Power siam dawn
Power Grid Corporation on India chuan vawiin hian zing dar 8 aṭanga tlai dar 4 inkarah 400kV sub-station, Sakawrtuichhunah hna an thawk dawn a, hei vang hian 132kV sub-station, Zuangtuiin a châwm sub-station dang, khua leh vengte'n vawiinah kawlphetha an hmu thei dawn lo. Kawlphetha hmu thei lo tur zingah Saitual, Khawzawl, Champhai, West Phaileng leh Mamit lamte an tel.

Tanpuina hlân
Mizoram Pradesh Youth Congress Committee president Dr Lalmalsawma Nghaka chuan nimin khan Synod Camping Centre, Neihbawiha ráltlânte tan ṭanpuina a hlàn. Dr Lalmalsawma chuan, "Burma rama kan unaute'n namén loin harsatna an tâwk mek a, an sahim nan Zo fate inpui Mizoramah an rawn lut mek a, theih ang tâwka lo tuamhlâwm hi Mizo mipuite mawhphurhna a ni," a ti. Synod Camping Centre-ah hian ráltlân mi 145 vel an awm mek a ni.

Raltlante tanpui
Samaritan Society of Mizoram chuan Myanmar aṭanga Mizorama rawn raltlante ṭanpuina atan nimin khan Tuiphai Group YMA hnenah thilpek an hlan. Thilpek hi Samaritan Society of Mizoram executive board-in an pawisa an thawhkhawm aṭanga lei niin, thawmhnaw, thleng leh hmeichhe mamawh chi hrang hrang a ni.

Synod tanpuina
September 23, Ningania Synod Executive Committee ṭhukhawm chuan Mizorama Myanmar ráltlânte ṭanpuina atan Rs. 20,00,000 pek a rêl. Synod secretary Upa Lalrinmuana hnen aṭanga thu dawn danin, Synod chuan ráltlânte awmna pastor bial vawngtute chu an biala ráltlân awm zat Synod-a hriattir turin an chah a, report a luh kim hnuah ṭanpuina sum pek chhuah a ni ang.