Mizoram - hmar chhakah thla khat chhung Hripui vei hmuh tam berna a ni tawh

September 23, Ningani khan Mizoramah Covid-19 vei mi 1,257 hmuh chhuah a ni a, India state zinga hripui vei hmuh thar tam lamah palina a ni. Thla khat chhung a záwnin hmarchhak state zingah hripui vei hmuh tam berna a ni tawh.

Covid-19 vei hmuh tharte chu mipa 590 leh hmeichhia 667 an ni a; ZMC laboratory-a hmuh chhuah 244, TrueNAT hmanga hmuh 109, RAT hmanga hmuh 855 leh Fluorescent Immunoassay (FIA) hmanga hmuh 49 an ni.

Nimin khan tlai dar 5 thlengin hripui vei dam tawh mi 751 chhuahtir an ni a, hripui vangin mi pathum an thi thung. IDSP record angin, Mizoramah Covid-19 vei 85,366 hmuh chhuah a ni tawh a, mipa 42,562 leh hmeichhia 42,804 an ni. Nimin tlai dar 5 thleng khan mi 70,084 (82.10%) chhuahtir an ni tawh a, mi 285 (0.33%) thi tawhin, enkawl mek mi 14,997 (17.57%) an awm.

September 23, Ningania Covid-19 vei hmuh thar mi 1,257-te chu symptom nei 638 leh nei lo 619 an ni a; tualchhunga kái 1,249 leh tun hnaia state pawn aṭanga rawn lut pariat niin, tualchhunga kái zingah kàina chin hriat loh 559 an awm.

Hripui vei hmuh thar mi 1,257 zingah nausên kum khat tling lo 18 an tel a, an zingah symptom nei pasarih an awm a; a naupang ber chu ni sariha upa a ni. Kum 70 chung lam mi 43 aia tlem lo awmin, an zinga a zatve aia tamin symptom an nei a; kum 90 tling tawh mi pali awmin, an zingah symptom nei an awm a, a upa ber chu kum 96 a ni.

September thla ni 23 chhungin hripui vei mi 25,366 hmuh a ni tawh a, chawhrualin ni tin mi 1,102.87 hmuh chhuah an awm ziah ang a ni. Kum 2011 chhiarpui aṭanga chhûtin Mizorama Covid-19 vei hmuh tawh 82,815 chu mi 1,000 zelah hripui vei mi 78 an awm ang a ni a; mi 1,00,000 zela Covid-19 vangin mi 25 an thi tawh ang a ni.

Nimin khan tlai dar 5 thlengin hripui vei dam tawh mi 751 chhuahtir an ni a; Aizawl district-ah mi 449, Siaha district-ah 79, Lawngtlai district-ah 67, Champhai district-ah 48, Mamit district-ah 46, Kolasib district-ah 40, Khawzawl district-ah 13 leh Lunglei district-ah pakua an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh zinga mi 80,873 chu Mizoram chhunga kái chhâwng an ni a, mi 4,493 chu Mizoram páwn aṭanga an rawn luh hnua hmuh chhuah an ni.