Sorkarin kum 2017-18 chhungin Drug license 32 a tihtawpsak

Health & Services department hnuaia Food & Drugs Administration chuan, sorkar kum liam ta 2017-18 chhung khan damdawi zawrh phalna drug license an pek chhuah aṭangin mi 32 chu an license an tihtawpsak.

Food & Drugs Administration (FDA) hotute sawi danin, April 2017 - March 2018 chhung khan drug license 32 an titawp a, damdawi dawr 74 chu insawifiah turin an hriattir. Drug license pahnih chu an tihtawp lailâwk hnuah an tinung leh a ni.

Health Services joint director (FDA) Lalsawma Pachuau chuan Vanglaini zawhna chhangin, kum 2017-18 chhunga drug license 32 an tihtawpsak chhan chu, Drugs and Cosmetic Act 1940 leh Rules 1945 tih tur leh tih loh tur a tarlan bawhchhiate an nih thu a sawi.

Lalsawma Pachuau chuan, damdawi zuarte'n an chah luhna (invoice) te, stock register te, sale register-te an chhinchhiah vek a ngai tih sawiin, damdawi hralh phal loh hralh te, doctor-te chawh ni loa khuh damdawi hralh te, Diazepam, Alprazolam, Nitrazepam-te dân kalha kawl leh hralhte an awm ṭhin tih a sawi a, "Chhan hrang hrang vangin dân kalha damdawi zuar leh hralhte chungah action lak a ngaih phah ṭhin a ni," a ti.

FDA hian kum liam ta thleng khan Mizoram pumah drug license 3,534 an pe tawh a, drug license chi ruk a awm a, license pek chhuah dan azirin damdawi zawrh leh hralh theih dan a inang lo.

Drug license pek chhuah zingah restricted licanse tam berin 2,879 an pe chhuak a, license an pek chhuah dangte chu - general-ah 372, wholesale-ah 224, Sch X-ah pasarih (20F), mobile (thingtlanga lirtheia damdawi sem) 35 leh homeopathy pakuate a ni.

Kum 2017-18 chhunga damdawi dawr 74-te insawifiah tura hriattirna, show cause notice an pek chungchangah Lalsawma chuan, "License kan pek chhuah hian, kan pek dan azirin zawrh theih chin a awm. Thingtlang in 200/300 awmnaah pawh damdawi mamawh zual an zawrh ve a ngai a, mahse, doctor chawh ni lo, a uchuaka hlâwk tum vanga mipui hnena hralh te, damdawi khuahkhirh hralh tê, hralh dân dik lo hrim hrimtê leh wholeseller zingah retailer hnen chauha hralh tur a nih lai a, mimal hnena hralh chíngte an awm tih kan hriat vang a ni," a ti.

Lalsawma Pachuau chuan, Mizote'n damdawi an nél lutuk nia sawiin, "Doctor chawh ni lo, mahni thua ei hi hlauhna kan nei lo. Hei vang hian keimahni kan intichhe nasa hle. Damdawi chhung ril kan hre si lo a, risk-in kan ei nasa lutuk," a ti a; damdawi dâwr nghakte'n anmahni thua mi damdawi chawh mai an chíng chu a pawi thu a sawi.