Sap ṭawnga hmasawnna tur hawng

Aizawl DC Dr A Muthamma chuan, nimin khan Aizawl district chhunga zirlaite sap ṭawnga tihhmasawn an nih theih nan ni nga chhung awh tur Training of Teachers chu DC conference hall-ah a hawng.

Dr A Muthamma chuan, DC hmasa zawk hun laiin Aizawl district-a zirlaite zir chian an ni tih sawiin, "Zir chiannaah hian zirlaite'n sap ṭawng ziak leh chhiar bakah, inbiakna atana hman kawngah harsatna an nei tih hmuh chhuah a ni," a ti.

ELF, Chennai hotute chuan, kum liam ta chhung khan Aizawl district SSA nen thawkhoin primary school 10-ah zirtirtu thlan bik neiin zirlaite tan sap ṭawnga hma­sawnna programme buatsaih a ni tawh tih an sawi. Kuminah pawh primary school 10-ah leh high school thlan bikahte SSA leh RMSA an thawhpui leh dawn.

Training chhung hian Aizawl district-a primary school leh high school thlante aṭanga English teacher-te'n video con­fe­rence hmangin sap ṭawng zirtir chung­changah English Learning Foundation, Chennai an thawhpui dan tur an zir dawn a ni.