NLUP chungchang Governor-ah thlen

BJP Mizoram Pradesh, PRISM leh Zoram Peoples Movement (ZPM) aiawhte chuan, nimin khan Governor Lt.Gen. Nirbhay Sharma hnenah lehkha an thehlut a; Congress kaihhruai Mizoram sorkarin Congress MLA mi 34-te chauh NLUP dawng tur thlang tura a tih chungchang an thlen.

Pawl pathumte chuan thuchhuah siamin, NLUP Implementing Board Chairman-in lehkha (Dt. 9th February, 2018: DO No. CHM/VC/AB/CHMN-NIB-15/2/621) hmanga Congress MLA-te chauh an biala mite NLUP dawng tur thlang tura tih an ni chu NLUP Manual Chapter IV patzûtna a nih thu an tarlang a, "2018 MLA inthlan thlir râna Congress party insawhnghehna mai niin kan ngai," an ti.

NLUP sum chu Congress party sum ni loin, Mizoram sorkar sum a ni tih sawiin pawl pathumte chuan, "Congress sorkarin party insawhngheh nana a hmang hian mipui huap lo, mipui sorkar ni lo, party bil sorkar a nihzia a pho lang chiang hleah kan ngai," an ti.

He thil hi Prime Minister, Mizoram Governor, Union Finance Minister, NITI Aayog Chairman, DoNER Minister leh sorkar laipuia mi pawimawhte hnenah ziaka an thlen thu an sawi.