Kum 2017-18 chhungin thisen unit 26,248 pek a ni

Sorkar kum liam ta, April 2017 aṭanga March 2018 chhung khan Mizoram pumah thisen unit 26,248 pek a ni.

Thisen pek zinga unit 21,880 chu pek bik nei loa a thlawna pek (voluntary donation) a ni a, voluntary donation hi 83.36% a ni.

Mizoram State AIDS Control Society (MSACS) chhinchhiah danin, kum 2017-18 chhunga thisen pek zawng zawng unit 26,248 hi kum hmasa 2016-17 chhunga pek unit 25,895 aiin unit 353-in a tam zawk a; voluntary donation percentage erawh a inzat thuak a, kum 2017-18 chhungin 83.36% a nih laiin, kum 2016-17 chhungah chuan 83.27% a ni. Pek bik neia thisen pek (replacement) chu kum 2017-18 ah unit 4,368 a ni a, kum 2016-17 ah chuan unit 4,332 a ni.

Mizorama blood bank 10 zingah Aizawl Civil Hospital (ACH)-in thisen dawng tam berin, unit 13,179 an dawng a, chu'ng zinga unit 11,467 (87.01%) chu voluntary donation a ni. Thisen dawng tlem ber Mamit District Hospital blood bank-in unit 268 chiah an dawng thung.

Voluntary blood donation sânna ber chu Christian Hospital, Serkawn a ni a, thisen unit 1,889 an hmuh zinga unit 1,714 chu voluntary donation niin, chu chu 90.74% a ni. Lawngtlai District Hospital blood bank chu voluntary donation percentage hniamna ber a ni thung a, thisen unit 1,144 an hmuh zinga unit 741 (64.77%) chiah voluntary donation a ni.

Kum 2017-018 chhung khan Mizoram puma pawl hrang hrangin blood donation camp vawi 433 an huaihawt a, donation camp aṭang hian thisen unit 17,380 hmuh niin, chu chu thisen hmuh zawng zawng aṭangin 66.21% a ni.

Donation camp nei tam ber ACH blood bank-in camp ṭum 155 neiin, chu'ng aṭang chuan unit 8,269 an hmu a; donation camp nei tlem ber Mamit District Hospital-in camp ṭum 10 neiin, chu'ng aṭang chuan unit 194 an hmu a ni.