MNF hian hnam pawi an khawih - Lalduhoma

ZNP president Lalduhoma chuan, MNF party chu Chakma-te ram siamsaktuah a puh a, "Congress leh BJP meuh pawhin an tih duh ngai loh thil - Chakma-te nation nihna thlenga pawmpui leh tiam duhtu MNF party hian hnam pawi an khawih a, hnam rilru púte thinlung an tina ngawih ngawih a ni," a ti.

Lalduhoma hian nimin khan an party pisaah thu sawiin, tunlaia social media-ah - November 18-20, 1997 chhunga Legislative Assembly session-ah MNF President-in, 'CADC lo pian chhuahnaah hian, zaah za a nih loh pawhin, 80% talin mawh kan phur,' a tih te, East Pakistan an awm laia 'Hetah hian ram i siamsak ang u,' an lo tih thu te, inthlan campaign lai a, 'Congress khan fahrah enkawlin an enkawl che u a, keini erawhin fa tak duatin kan duat ang che u,' a tih te, MNF-in Chakma MLA nei a, CADC-ah sorkarna la a, Chakma zinga ‘Hnam Run’ an din thute a lar thar hle tih a sawi.

Chakma leh CADC chungchanga MNF President thu sawi a lar thar leh chhan chu, tun hnaia CADC inthlan campaign-naa MNF poster-a thu inziak vang a nih thu sawiin Duhoma chuan, "Poster-ah hian 'MNF party promise you a vibrant CADC and a vibrant Chakma nation' tih a intár a. A sir leh lehlamah MNF symbol leh MNF President thlalak leh RM Chakma thlalakte a chuang bawk. Chu poster behchhan chuan MNF President-in parṭhi lianpui awrh chungin hlim takin thu a sawi a ni," a ti.

Lalduhoma chuan, MNF kum 10 an sorkar chhungin Zo hnahthlakte foreigner tiin hnawhchhuah an ni tih sawiin, "Chakma foreigner erawh pa­khat­mah an hnawtchhuak ve lo," a ti a; MNF-te chu Pu Laldenga hming lam ri miah loa Remna Ni leh Martarte Ni hmang thei tawh party an nih thu a sawi.

ZNP President chuan, tunlaiin party tinin an tum angin boruak an siam thei lo nia a lan thu sawiin, "A chhan chu sorkar tawh leh sorkar mekte thlakna atana mipui hual rawn ZPM inpeih hun mipuite'n an nghah vang niin a lang," a ti.

Lalduhoma chuan, Zoram Peoples Movement (ZPM)-in a kháwlpui a tilum mek a, tun aṭanga rei lo têah campaign kick-off programme pui tak hjman tum a nih thu sawiin, "Ram pum kan tuam ve tak tak tawh dawn a ni," a ti a; ZPM unit dinna apiangah kohhran leh NGO-a inhmang mi hmingṭhate'n hma an tawn zel thu a sawi bawk.