Sentût hri danna pek ṭan a ni

Sentût natna ûm bona tura sorkar laipui ruahman, Measles-Rubella (MR) vaccination campaign chu Mizorama a hmasa ber atan nimin khan Siahaah pek ṭan a ni a, Don Bosco School-ah Siaha bawrhsap Harleen Kaur-i'n a hawng.

Campaign hawnnaah hian MR vaccination-a nodal officer Dr Hnie­chho-i'n MR chungchanga hriat tur pawimawhte a sawi. MR vaccine chu doctor fate'n an la ve dawn lo tih sawi thâwm sikul naupangte zingah a awm nia an sawi vangin, sikul naupang zawng zawng hmuh laiin Dr Hniechho leh Dr Samuela fate pek hmasak ber a ni.

MR vaccine hi vawi khat laka dam chhung daih tur (lifetime vaccine) a ni a, naute thla 9 pumhlûm tawh leh tleirawl kum 15 inkar zawng zawngte pek tura ruahman a ni. Siaha district-ah hian naupang 18,043 pek tum a ni.

MR vaccine beihpui thlakna hi thla khat chhung kalpui tur a ni a, sikulah pek hmasak a ni ang. Chawlhkar khatna aṭanga chawlhkar thumna thlengin sikul, aganwadi centre leh community centre-ahte pek a ni ang a, chawlhkar lina chu la pek lohte thual nawnna atan hman a ni ang.

MR vaccination campaign-in a tum chu - kum 2020-ah sentût (measles) leh German sentût (rubella) natnate ûm bo a ni a; India ram pumah beihpui thlak ṭan tawh a ni. Mizoramah pawh nimin khan district zawng zawngah ṭan tum a ni a, mahse, Siaha district tih loh district dang zawngah chuan April 18-ah ṭan tum a ni.