Miss Zofa International Contest April 18 aṭangin ṭan dawn

Lelte Weekly chuan khawvel hmun hrang hranga Zo hnahthlakte inpumkhatna tur a nih beiseiin Miss Zofa In­ter­na­tional Contest chu a vawi khat nan a buatsaih dawn a, April 18 hian ṭan a ni ang.

Miss Zofa Inter­national Contest 2018-ah hian hmun hrang hrang aṭangin contestant mi 24 an fuankhawm dawn. Mizoram pawn aṭangin mi 13 an tel dawn a, Myanmar chu contestant thawh hnem ber tur an ni. Myanmar aṭang hian mi pali an tel dawn a, Bangladesh aṭangin contestant pakhat a awm dawn bawk. A bak chu India ram chhung aṭang vekin an ni dawn a, Tripura, Shillong, Haf­long, Barak Valley Region leh Manipur aṭng tein tel tur an awm nual bawk.

Organizsing Com­mittee chuan nimin khan Aizawl Press Club-ah thuthar thehdarhtute an kawm a, Miss Zofa International Contest buatsaih chhan an sawi­fiah. Chief Organiser C.Dinthanga chuan, "Hmun hrang hranga Zo hnahthlakte inpumkhatna chu kan ngaihpawimawh ber a ni a, chu mi beisei chuan Miss thlanna pawh hi sum tam tak sengin bautsaih kan ni" a ti. Vanglaini palaiin chhunzawm zel tur a ni em tih a zawhna chu chhangin, "A hlawhtlin chuan kum khat danah neih chho zel tum a ni a, chutih rual chuan Zo hnatlak unaute inkara boruak ṭha lo siamtu leh beisei anga a hlawhtling lo a nih chuan kalpui zui a ni lo ang" a ti bawk.

Miss Zofa Inter­na­tional Contest-a pakhatna hian lawmman pawisa fai Rs. 3,00,000 leh car thar a dawng dawn a, pahnihna leh pathumna ten Rs. 1,50,000 leh Rs. 1,00,000 an dawng bawk ang. Lawmman hi pangana thleng a awm dawn a, sub-title pariat sem chhuah a ni dawn bawk. Intihsiak hi naktuk aṭangin ṭan a ni dawn a, Grand Finale hi April 27 khian MZU Auditorium ah neih tura ruahman a ni. Miss Zofa International thlanna hi LPS chuan an pechhuak ṭhin dawn a ni.