COVID-19: Mizoram dinhmun Hripui vei mi 20 hmuh belh a ni

November 25, Nilaini khan Mizoramah Covid-19 vei mi 20 hmuh chhuah a ni a, nimin khan hripui laka fihlîm tawh mi 33 chhuahtir an ni thung.

Covid-19 vei hmuh chhuah tharte chu mipa 14 leh hmeichhia paruk an ni a; ZMC laboratory-a hmuh mi 10, TrueNAT-PCR hmanga hmuh mi pakhat leh Rapid Antigen Test (RAT) hmanga hmuh mi pakua an ni.

Nimin khan hripui laka fihlim tawh mi 33 chhuahtir an ni a; Aizawl district-ah mi 17, Lunglei district-ah mi pathum, Serchhip district-ah pakhat, Lawngtlai district-ah 10 leh Saitual district-ah mi pahnih an chhuak.

Mizoramah Covid-19 positive mi 3,765 hmuh chhuah a ni tawh a, mipa 2,784 leh hmeichhia 981 an ni. Nimin tlai dar 5 thleng khan mi 3,352 (89.03%) chhuahtir an ni tawh a, mi panga (0.13%) thi tawhin, enkawl mek mi 408 (10.84%) an awm.

Covid-19 positive hmuh tawh mi 3,765 zinga mi 1,750 chu Mizoram chhunga kái an ni a, mi 2,015 chu state páwn aṭanga rawn lût an ni.

November 25, Nilaini khan Mizoramah swab sample 1,502 endik a ni a, chu'ng aṭang chuan Covid-19 positive mi 20 an hmu chhuak. Swab sample endik dan chu - ZMC laboratory-ah mi 299, TrueNAT-PCR hmangin district pakuaah mi 234 leh RAT hmangin district 11-ah mi 969 an ni.

Covid-19 vei hmuh thar mi 20 zinga 14 chu tualchhunga kai an ni a, Mizo 12 leh hnam dang pahnih an ni. An zingah hri kài ṭanna hriat theih loh pahnih an awm a, natna (Covid-19 symptom) lang chuak mi pahnih an awm bawk. TrueNAT-PCR hmanga hmuh chhuah pakhat chu Bihar Assembly inthlana duty zinga mi a ni.

Sorkar thuchhuah tarlan danin, ZMC laboratory-a RT-PCR hmanga hripui vei hmuh chhuahte chu mipa pasarih leh hmeichhia pathum an ni a, an zingah naupang kum 3 mi a tel. An zinga mi paruk chu Mizoram chhunga kai an ni a, mi pali chu state páwn aṭanga tun hnaia rawn lût an ni thung.

State páwn aṭanga rawn lut zinga pakhat chu Lungverha awm 5th IR police kum 44, Bihar inthlana duty zo rawn haw a ni a, symptom a nei. BSF sipai pahnih leh Assam aṭanga rawn lut mipa kum 18 mi hmuh chhuah a ni bawk a, khung hran lai niin, symptom an nei lo.

TrueNAT-PCR hmangin Serchhip District Hospital-ah Covid-19 positive hnam dang mipa kum 26 mi, Bhavya company-a thawk hmuh chhuah a ni a, quarantine facility-a awm lai, symptom nei lo a ni.

RAT hmanga hripui vei hmuh chhuah mi pakuate chu mipa paruk leh hmeichhia pali an ni a, tualchhunga kái mi pariat leh state páwn aṭanga lut mi pakhat an ni. State páwn aṭanga rawn lut chu Jaipur, Rajasthan aṭanga rawn lut mipa kum 38, State Guest House, Aizawla inkhung hrang mek a ni a, symptom a nei lo.