Kum 2021 tìr lamah Covid-19 vaccine A lo thlen kan beisei - Health Minister

Minister Dr R Lalthangliana leh govt. deputy chief whip Lalrintluanga Sailo, MLA-te chuan nimin khan Lawngtlaia Mizo Hnam Rûnah LADC MDC inthlan tura MNF party campaign hawnna hun an hmanpui a; Minister chuan, Covid-19 vaccine chu 2021 kum tìr lamah a lo thlen an beisei thu a sawi.

Dr R Lalthlangliana chuan, MNF chu 'Pathian leh kan ram tan' titu an nih avangin Pathianin Zoramthanga kaihhruai mipui sorkar a pe niin a sawi a, "Kan hun hmasaah mau a tám a, mak tak maiin Pathianin ruahmanna min siamsak a, a thlàwnin kum khat dáwn buhfai kan sem," a ti.

LADC inthlan turah chuan ram mipuite retheihna aṭanga chhan chhuak turin theihtawp chhuah a ṭul thu sawiin R Lalthangliana chuan, "SEDP-ah hian thil ṭha tinréng dah khawm a ni a, Covid-19 boruak vangin kalpui hleih theih a ni lo," a ti a; SEDP chu a taka tihlawhtling turin sorkarin hma a lak zel dawn thu a sawi.

Dr R Lalthangliana chuan, Mizoram chu Covid-19 donaah a ti ṭha lawr lak niin a sawi a, "Covid-19 vaccine pawh nakkum tìr lamah chuan a lo thlen kan beisei," a ti.