Mizoram hi 'landlock' a ni lo, Mipui rilru a in 'lock' - RS MP

Rajya Sabha MP K Vanlalvena chuan nimin khan a chenna inah MJA Gen.Hqrs hruaitute a kâwm a; Mizoram chu 'landlock' a ni lo a, mipui rilru a in 'lock' ṭhin zawk tih sawiin, ram dang nena inkalpawhna thui tak nei, ram dang nena insumdawn tawnna hmun remchang tak nei a nih thu a sawi.

K Vanlalvena chuan, Mizoram chu India rama state ṭhenkhat angin landlock a nih loh thu leh ram lailia awmte chu landlock a ni zawka a hriat thu sawiin, "Landlock nia kan inhre tlat hi kan rilru zawk a ni a, kan rilru lock-tu hi kan hui kian a ngai. Thil tihhlawhtlin dawn chuan thinlung lam aṭangin a hlawhtlinna tura bul ṭan hmasak a ngai," a ti.

Rajya Sabha MP chuan, "MP thar ka nih avangin khawr tak chung leh tih tur chin leh chin loh pawh thliar thiam lo chungin Mizoram leh hnam tan ka su ve pawp zel mai a ni," a ti a; Mizoram hmasawnna turin project thar bawhzui tur eng emaw zat a neih thu a sawi.

Mizoram tana tih theih nia a hriat a sawi zingah, ramhmul damdawi sawngbàwlna Mizorama din chungchang te, environment tichhe si loa eizawnna leh hmasawnna hna thawh chungchang te, hlâwk tak tak tham tura khuai khawi chungchang te, Mizorama luite ṭangkai lehzuala hman a nih theih nan chhim lama leilet tam zawk siam leh lawng hman ṭangkai chungchangte a tel.

MJA president Zonun­sanga Khiangte chuan, MJA leh MJA member-te mamawh, MP a nihna anga a bawhzui theih tur chite a sawi lang a; Mizoram leh hnam tan theihtawpa thawk turin duhsakna a hlân.

Journalist-te kaih­hnawih chungchangah K Vanlalvena chuan, a theih ang anga hmalak a tum thu a sawi a; MJA member-te tan defence tour buatsaih a nih theih nan bawhzui a tum thu a sawi bawk.