RT-PCR lab. tam zawk bun turin CYMA-in Mizoram sorkar a ngen ; RAT ringawta innghah Mizoram tan a him lo - CYMA

Central YMA chuan, Covid-19 hripui vei leh vei lo hriat zung zung an nih theih nan RT-PCR laboratory a tam thei ang ber din belh tur leh chak taka hma la turin Mizoram sorkar an ngen. CYMA CEC chuan Rapid Antigen Test hmanga endik zingah result dik lo a tam thu leh Mizoram tan a him loh thu meeting-ah an sawi lang.

September 25, Inrinnia YMA, Central Executive Committee member-te CYMA Committee Room-a ṭhukhawm chuan thuchhuah siamin, hripui léng mek avanga harsatna awm mek leh hripui vanga thi an pung zel chu pawi an ti a, lusûn chhungte an tawrhpui thu an tarlang.

CYMA thuchhuah chuan, "Hripui kai leh kai lote hriat chhuah zung zung an nih theih nan YMA CEC chuan RT-PCR laboratory tam thei ang ber din belh a nih theihnan Mizoram sorkar chu chak taka hma la turin a ngen a ni," a ti.

CYMA hruaitute hnen aṭanga thu dawn danin, CEC ṭhutkhawmah hian Mizorama swab sample endikna atana hman tam ber Rapid Antigen Test hmanga sample endik zingah result dik lo a tam thu te, Covid positive si, negative anga hmuh an awm avanga a huna enkawlna dawng hman lo, thi zui ta an awm nuala an hriat thute an sawi.

Sample endikna result dik tâwk loh avangin hripui a darh zel nia a lan thu te, RAT ringawta innghah chu Mizoram tan a him loa an ngaih thu te, zin chhuak duhte'n RT-PCR negative certificate an mamawh ṭhin avangin tuna Mizorama RT-PCR laboratory pakhat chauh a awm chu a tâwk loa an ngaih thute an sawi bawk.

High Court thupek kal zela Lunglei Zotlanga Tourist Lodge-a RT-PCR khawl bun tum chu bawhzui zel niin, Tourist Lodge building thawm ṭhat hna thawh mek a ni a; hna thawktute chu YMA Sub-Hqrs, Lunglei hruaitute'n an vil ṭhin. RT-PCR khawl hi kumin October thla chhungin peih hman tuma hna thawh mek a ni a; YMA Sub-hqrs pawhin October thla chhung ngeia hman theiha RT-PCR lab. chu peih turin sorkar an lo phût tawh bawk a ni.

Hetih lai hian, Civil Hospital, Lungleia RT-PCR laboratory dinna tur in thar sak tura tih chu buaipui mek a ni bawk a; tun dinhmunah a ban phunna tur lei laih mek niin, an la lài zo lo nia thu dawn a ni.