Ei chawp dawrte'n inhawn hun pawhsei an duh

Aizawla ei chawp dawrte chuan Covid-19 hri leng avanga sorkar ruahmannate an zawm zel thu an sawi a, chutih rualin, dawr an hawn theih hun chhung chu pawhsei an duh thu an sawi hlawm.

Vanglaini palaiin Aizawl veng paruk - Chanmari, Zarkawt, Dawrpui, Sikulpuikawn, Khatla leh Kulikawna ei chawp dawr hrang hrang, zing dar 9 thlenga inhawng theite tun hnaia a kawmnaah, dawrtu (customer) an neih meuh loh thu leh an inhawn theih hun chhung chu beitham an tih thu an sawi hlawm a ni.

Mizoram sorkar chuan Covid-19 leng avangin Aizawl khawpuiah inkhuahkhirhna khauh bik a siam a, dàwr inhawn theih dan tur hrang hrang a siam. Chung zingah chuan ei chawp dawrte chu ni tin zing dar 5-9 inkar hawn phalsak an ni.

Aizawl khawpui lûn laia ei chawp dawr hrang hrang neitute chuan an dinhmun tlangpui leh dawr an hawn theih hun chhung chungchangah Vanglaini palai zawhna chhángin, Covid-19 léngin mipui nunphung a tihbuai chu an hai loh rualin, tun dinhmuna an eizawnna chuan an mamawh khawp sum leh pai a phuhru mawh hle tih an sawi.

Mizoram sorkar chuan Covid-19 léng vangin March 23, 2020 aṭanga September 18, 2021 thleng khan inkhàrkhip leh inkhuahkhirhna (lockdown/ partial lockdown) vawi 30 a puang tawh a; tunah hian a vawi 31-na, October 2, 2021 thleng awh tur kalpui mek a ni a, Aizawl khawpui bikah inkhuahkhirhna khauh bik hman a ni.

Dawrtu an awm tlem
Vanglaini palaiin zing dar 5:30 - 9:00 inkara Aizawl khawpui a fan kualnaah mihring chhuak an tlem hle a, zinga páwn chhuakte chu a tlangpuiin taksa sawizawi (exercise) an ni. Mipui náwlpui chu zing dar 8 hnu lamah an awm ve ṭan.

Ei chawp dawr nghaktute chuan customer an nei meuh lo ṭhin tih sawiin, "Zinga kan inhawn chhung hian mamawh bik riau neia rawn chhuakte leh ṭhenawm khaw vengte tih loh chu a tlangpuiin exercise la an ni a, tui in tur an rawn lei hi kan inhralh tamna a ni deuh ber," an ti a; Covid-19 inkhuahkhirhna avanga mipui inthlahdah avangin zingah mi náwlpui an tho hman lo nia an ngaih thu an sawi.

Kawng kama thawmhnaw zuarte zinga mahnia dawr nei ve lote chuan zing dar 9 thleng chauh inhawn chu rei lo an tih thu an sawi a, "A tlangpuiin kan inhawn ve theih hun chhunga zing dar 8-9 inkarah hian mipui chhuak an tam ve ṭan deuh a, mahse, kan inhawn theih hun a tàwp dawn hnaih tawh avangin kan inhralh dawn chauh a, inseng a ngai leh nghal mai ṭhin," an ti.

Dawrtu an nei dawn chauh tihah inkhâr a hun leh mai ṭhin avangin inhralh miah loh ṭum an neih ṭhin thu sawiin, "Dawr hawng turin zing karah kan kal ve vang vang a, customer nei loa haw leh kan nei fo. Mahse, kan eizawnna ber a ni si a, beiseina nei chungin zing tin kan inhawn ve a ngai si," an ti a; an inhawn theih hun chhung chu tihdanglam theih ni se an duh thu an sawi.

Dawr luah man leh leiba
Ei chawp dawr nghaktu zingah mahni ina dawr siam leh mi in luah an awm a, kawngpui kama inpho pawh eng emaw zat an awm bawk.

Dawr nghaktu ṭhenkhat zinga mi in luaha dawr siamte chuan, customer nei mumal hmana inhawn ve an châk thu sawiin, "Zing dar 9 thleng chauh inhawn chuan dawr luah man leh chhungkaw châwmna tur inhralh chhuah a harsa khawp mai, inhralh ṭhat cháng chu awm ve ṭhin mahse a thleng zen zen lo," an ti a; thawmhnaw zuarte pawhin an thawmhnaw neih azirin inhralh ṭhat ṭum leh kutbénga haw châng an neih fo thu an sawi.

Covid-19 lèn tirha inkhàrkhipna pumhlûm lai khan sum lak luhna mumal an neih loh avangin mi pawisa an pûk thute an sawi a, "Tunah dawr kan hawng ve thei ta a, zing lamah customer an awm mumal lo tih hre mah ila chhungkaw enkawlna tur te, dawr luah man leh leiba rulhna tur kan zawn ve hram hram a ngai," an ti a; dawr an hawn theih loh laiin kohhran, khawtlang leh Chief Minister's Relief Fund aṭanga puihna dawng an awm thute an sawi bawk.

'Kan invéng thei ang'
Zing lam chauha dawr inhawng theite chuan, Aizawlah Covid-19 a darh nasat thu leh fimkhur a ṭul tih an hriat thu te, sorkarin inkaihhruaina a siamte chu an zawm theih thu leh hripui darh zel tur vèn chu ṭha an tih thute an sawi a, "Mipui kan pawimawh a, kan fimkhur tlàn chuan nasa takin kan veng thei ang," an ti.

Chutih rualin, sorkarin Aizawla hripui inkai darh tamna hrang hrang a tarlan ṭhinah dawr aṭanga inkài chhâwng an tel ngai lem lo nia sawiin, "Chuvangin, kan inhawn theih hun hi nilénga min tihsak theih loh pawhin, chawhma emaw tal chu ni thei se," an ti. Zing kara dawra kal lote chu chhûnah an chhuah tho thu te, mi ṭhenkhat chuan chhunah mamawh lam nana dawr hawng tura an biak leh tho ṭhin thu te, duty-te an khauh ṭhin avangin sorkarin hun a siamsak chhung bâk dawr an hawn ngam ngai loh thute an sawi bawk.