Aizawl DC-in inkhuahkhirhna bik a sawifiah

September 25, Inrinni khan Aizawl DC Dr Lal­hriatzuali Ralte chuan Covid-19 chungchanga red zone, restricted area leh containment zone puan dan sawifiahna a tichhuak a; restricted area-ah inkaih­hruaina hranpa leh khirh zawk kalpui ṭhin a nih thu leh containment zone-ah chuan inkaihhruaina awm sa hman ṭhin a nih thu a tarlang.

Aizawl Bawrhsap chuan, Covid-19 vei mek (active case) awm zat leh ni sarih chhunga kai thar awm dan azirin zone pathum - red zone, orange zone leh green zone-ah ṭhen ṭhin a nih thu a tarlang a, "Active case 80 aia tam awmna leh ni sarih chhunga ni tin kái thar an awmna veng/khuate chu red zone-ah dah a ni ṭhin a, hri vei tamna a ni tih a entir a ni. Red zone-ah inkhuahkhirhna hran a awm lo a, sorkar SOP hman a ni," a ti.

Task force-te'n red zone-a awmte dinhmun DC-a an hriattir dan azirin inkhuahkhirhna khauh zawk kalpui ṭhin a nih thu tarlangin, "An veng chhung dinhmun enin inkhuahkhirhna kalpuina turin veng pum emaw, YMA section huam chhung/thlêr/building bik emaw restricted area-a puang tur leh inkhaihhruaina turte an duang a, DC/CMO-ah rawtna an thlen ṭhin," a ti a; CMO-in an zir chian hnuah DC-in restricted area-ah a puang a, inkaihhruaina khirh zawk kalpui ṭhin a nih thu a tarlang.

Containment zone chu restricted area puan dan ang deuh thoa puan a nih rualin, inkaihhruaina/inkhuahkhirhna (SOP) awm sa hman ṭhin a nih thu te, task force-in veng chhung SOP tur an duan ve loh thute a tarlang bawk.

Aizawl DC tarlan danin, August 19, 2021 aṭanga September 24, 2021 thlengin Aizawl district-a veng/khua 22 chu restricted area-ah puan a ni tawh a, chu'ng zinga 14 chu hlih a ni tawh. Red zone-a puan mek veng 17 leh restricted area-a puan tura buaipui mek veng pali - Zotlang, Khatla, Hunthar leh Edenthar Vengte an awm.