Covid-19 dona atan budget-ah 3.5% chiah dah a ni - Vanlalhlana

ZPM Legislature Party deputy leader Vanlalhlana chuan, Mizoram sorkarin Covid-19 dona atan budget aṭangin 3.5% chiah a dah tih a sawi a, ennawn vat turin sorkar a phût.

Vanlalhlana hian September 25, Inrinnia a bial chhung veng ṭhenkhat a tlawhnaah thu sawiin, "Budget aṭanga 3.5% chiah Covid-19 beih letna atana sorkarin a sanction hi state dang nen khaikhinin a beitham lutuk a, hei aia tam hi dah ngei rawh se. State dangte'n Covid-19 lakah kiam lam an pan char char laiin Mizoram chuan pun lam kan la pan zel a, hei vang hian budget-ah sum tam zawk dah a ṭul," a ti.

ICMR-in inkaih­hruaina a siam ang ni loa Mizorama RT-PCR khawl aia RAT an la hmang uar chu hripui donaah Mizoram a hnufûm phah nia sawiin Vanlalhlana chuan, "Ni tin ei leh bâr zawnna kawngah mipui tam takin harsatna an tâwk a, chhuanchhamte khaichhuah vatna turin ruahmanna siam thar a ngaih chuan a rang thei ang berin sorkar hian siam vat rawh se," tiin sorkar a phût.

ZLP Deputy Leader chuan, Mizoram chhim lam district palite'n ṭangkai taka an hman turin Lungleiah RT-PCR khawl hman a nih thuai theih nan hma la vat turin Mizoram sorkar a phût tih a sawi bawk.