Covid-19 vei kiam theih loh chhanah imal anga indemna chi a ni lo - MNF
MNF chuan, Covid-19 do kawngah Health minister Dr R Lalthangliana leh Covid-19 Medical Operational Team chairman Dr ZR Thiamsanga te hlawhchhamah Congress party-in an puh leh báng tura an phût chu thuchhuah siamin an chháng a, "Covid-19 vei kiam theih loh chhanah mimal anga indemna chi a ni lo," an ti.
Covid-19 chu Mizoramah a la kian mai theih loh thu tarlangin MNF chuan, "Health Minister leh MOT Chairman pawhin an mawhphurhna a nih hriain, hripui lo luh hma atang tawhin a lo inven lâwk dan turte ngaihtuahin theihtawpin hma an la báng lo. Hripuiin min luhchilh tak tak hnu vawiin thleng hian an la châwl hman lo a, an ṭulin an buai em em reng a, an thawh hahzia hretu pawh mipui kan ni," an ti a; Chief Minister, minister, MLA, kohhran, NGO, sorkar leh mimal pawhin hripui dona kawngah thâ an thawh nasat thu an sawi.
MNF chuan, Mizo mipuiin hripui an ning tawh tih sawiin, "Hri hi tàwp tawh se kan duh vek a, a donaah kan ṭangrual ṭha em em. Hripui léng tàwp thei mai lo hi hreawm kan ti vek a ni. MPCC-te'n Health Minister leh MOT Chairman thlúr binga an mawhphurhna bik anga puha demin, báng tura an nawr ve sek hi politics-a inerna leh inîtsîkna vangah kan ngai. Covid-19 do danah anmahni pahnih emaw mimal ngaihdana hma la an ni lo," an ti.
MNF tarlan danin, Covid-19 donaa hmalaknaah kohhran aiawh, NGO aiawh, LC aiawh, AMC aiawh, Covid-19 donaa pawimawhna nei sorkar department-te aiawh leh minister dangte ko khawmin, ngaihdan leh ṭha tura ngaihte an sawi ho a, hmalak zel dan turah rorelin thutlukna an nei ṭhin a; political party aiawh koh tel cháng a awm bawk. Chumia an thutlukna angin hmalak ṭhin a ni.
MNF chuan, MPCC-te'n Health Mnister leh MOT Chairman-te chu an sumdawnna tur in thar saka hlawhtlinga an sawi pawh an sawifiah nghal a; Health Minister chu kum tam tak chhung college-a a thawh tawhna pension hlawh a khâwl khawm hmanga Lengpuia home stay sa a nih thu an tarlang. Hualngohmuna BN College of Nursing tur sak mek chu Dr Joseph Lahmingthanga, BN Foundation Society Chairman leh CEO-in loan laa a sak a nih thu an tarlang bawk.
MNF chuan, "Congress party hian hripui hi politics khelh nan hmang chhên tawh lo se, kan zavaiin ṭangruala do tlang turin MNF chuan a sawm zawk a ni," an ti.