Minister-in kudam leh laboratory a hawng

Food, Civil Supplies & Consumer Affairs (FCSCA) minister K Lalrinliana chuan September 25, Inrinni khan Lawngtlaia Principal Distribution Centre (PDC) kudam leh Legal Metrology working standard laboratory a hawng.

K Lalrinliana chuan, ei leh bâr leh ni tin khawsakna atana mamawhte hnianghnâr taka mipuiin an hmuh theih nan FCSCA-in theihtawp a chhuah tih a sawi a, "Inkalpawhna kawngin duhthu a sâm lohna hmunah fûr laia buhfai leh ration mamawh tur chhêk khâwl vek a ni," a ti.

FCSCA hnuaiah central sector scheme 2017-20 aṭangin Mizorama hmun 10-ah cheng nuai 1,922 sêngin intermediate storage kudam sak a nih thu sawiin Lalrinliana chuan, "Lawngtlai PDC kudam pawh heng zinga mi hi a ni a, buhfai mamawh chhêk khâwlnaa harsatna awm thei tam tak a sutkian beisei a ni," a ti.

Supply Minister chuan, FCSCA department hnuaia pêng pakhat, Legal Metrology chu mipuiin ei leh bàr leh ni tin mamawh hrang hrang ṭha tak leh bûk tling ngei an hmuh theih nan an pawimawh tih a sawi a, "Sorkar pawhin ngai pawimawhin a thuam chak zel a, mipuite'n an dikna chanvo an hmuh theih nan hmasawnna lawmawm tak a ni," a ti a, Consumer Forum thuam chak kawngah hma an lak mek thu a sawi bawk.

Lawngtlai PDC kudam hi buhfai metric ton 1,000 dah theihna tur a ni a, Babie Construction & Consultancy Services-in Rs. 2,00,44,000 sêngin an sa a, October 19, 2019-ah sa ṭanin, September 25, 2020-ah an sa zo.

Legal Metrology working standard laboratory chu Strengthening of Legal Metrology Infrastructure of States & UTs scheme grant in aid Rs. 50,00,000 hmanga sak a ni a, Mizoram Technocrats-in an sa a, June 1, 2016-ah sa ṭanin, February 28, 2017-ah an sa zo a ni.