KHAWTHLIR

UPC Missionary Day
September 25, Inrinni kha UPC North East India kohhran Missionary Day a ni a, hripui léng avangin a huhoa hman theih ni lo mah se, mahni remchan danin zing ṭawngṭai leh chhung inkhawmah hun hman a ni. UPC (NEI) hian Mizoram chhung bakah, Assam, Dimapur, Upper Assam & East Arunachal, North Bengal & Sikkim, Bihar & Jharkhand, Odisha, Andaman & Nicobar Island, Arunachal Pradesh leh Bhutan-ahte missionary 250 vel a tír chhuak mek a ni.

Thisen pe
ṬKP, Ramhlun Bial chuan ṬKP Coordination, Aizawl huaihawtin September 25, Inrinni khan BCM, Ramhlun North Kohhran hall-ah Aizawl Civil Hospital tan thisen unit 44 an pe a, petute mipa 40 leh hmeichhia pali an ni. KṬP, Chanmari Branch pawhin Inrinni khan an kohhran hall-ah Synod Hospital tan thisen unit 27 an pe a, petute mipa 22 leh hmeichhia panga an ni. PYD (UPC NEI), Lunglei Luangmual Bial chuan Lunglei Civil Hospital tan Luangmual UPC Sunday School Hall-ah thisen unit 13 an pe bawk.

Minister-in tlawh
Fisheries minister K Lalrinliana chuan September 25, Inrinni khan Ṭawipui North-II, Lunglei district-a fish seed farm, Zobawka Fish Seed Farm, District Park leh Lawngtlai district Ngengpuikai khuaa fish farm-te a tlawh a; chei ṭhat leh hmalak ṭulte a enfiah. Minister hi Lawngtlai East bialtu MLA H Biakzaua, Lunglei South bialtu MLA Dr K Pachhunga leh sorkar hotute'n an ṭawiawm a ni.

YMA-in raltlânte tanpui dan tur rél
Central YMA hruaitute September 25, Inrinnia ṭhukhawm chuan, Myanmar buaina avanga Mizorama ráltlân rawn lutte chhawmdawl turin theihtawpa hmalak zui zel an rél a; hmalakna leh ṭul dangte chu Myanmar Ráltlânte Ṭanpuitu Committee ruahman turin an dah. CYMA chuan, ráltlânte buaipuina kawnga YMA sub-headquarters, group leh branch-te hmalaknaah lawmthu an sawi a ni.