Ni hnih chhungin hripui vei Mi 2,800 hmuh belh a ni

September 24, Zirtawpni khan Mizo­ramah Covid-19 vei mi 1,322 hmuh chhuah niin, September 25, Inrinni khan mi 1,478 hmuh belh leh a ni a, ni hnih chhungin mi 2,800 hmuh belh a ni. Inrinni leh nimin khan hripui vei dam tawh mi 765 chhuahtir an ni a, Inrinniah mi pahnih leh niminah mi panga an thi.

Covid-19 vei Sep­tember 24-a hmuhte chu ZMC laboratory-a hmuh chhuah 278, TrueNAT hmanga hmuh 52, RAT hmanga hmuh 947 leh Fluorescent Immunoassay (FIA) hmanga hmuh 45 an ni a; September 25-a hmuh belhte chu ZMC-a hmuh 352, TrueNAT hmanga hmuh 54, RAT hmanga hmuh 1,064 leh FIA hmanga hmuh pariat an ni. Ni hnih chhunga hmuh tharte hi mipa 1,283 leh hmeichhia 1,517 an ni.

Sept. 24, Zirtawpnia Covid-19 vei hmuh thar mi 1,322-te chu symptom nei 705 leh nei lo 617 an ni a; tualchhunga kái 1,321 leh tun hnaia state pawn aṭanga rawn lut pakhat niin, tualchhunga kái zinga mi 563 chu hri an kàina chin hriat loh an ni.

IDSP record angin, Mizoramah Covid-19 vei 88,166 hmuh chhuah a ni tawh a, mipa 43,845 leh hmeichhia 44,321 an ni. Nimin tlai dar 5 thleng khan mi 72,086 (81.76%) chhuahtir an ni tawh a, mi 294 (0.33%) thi tawhin, enkawl mek mi 15,787 (17.91%) an awm.

September 25, Inrinnia Covid-19 vei hmuh thar mi 1,478-te chu symptom nei 712 leh nei lo 766 an ni a; tualchhunga kái 1,468 leh tun hnaia state pawn aṭanga rawn lut 10 niin, tualchhunga kái zingah kàina chin hriat loh 603 an awm.

September thla ni 25 chhungin hripui vei mi 28,166 hmuh a ni tawh a, chawhrualin ni tin mi 1,126.64 hmuh chhuah an awm ziah ang a ni a; September ni 25 zinga ni 18-ah mi 1,000 aia tam hmuh a ni.

Kum 2011 chhiarpui aṭanga chhûtin Mizorama Covid-19 vei hmuh tawh 88,166 chu mi 1,000 zelah hripui vei mi 80 an awm ang a ni a; mi 1,00,000 zela Covid-19 vangin mi 26 an thi tawh ang a ni.

Nimin khan tlai dar 5 thlengin hripui vei dam tawh mi 765 chhuahtir an ni a; Aizawl district-ah mi 415, Lawngtlai district-ah 132, Kolasib district-ah 74, Mamit district-ah 66, Khawzawl district-ah 27, Serchhip district-ah 16, Hnahthial district-ah 15, Champhai district-ah 14 leh Lunglei district-ah paruk an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh zinga mi 83,662 chu Mizoram chhunga kái chhâwng an ni a, mi 4,504 chu Mizoram páwn aṭanga an rawn luh hnua hmuh chhuah an ni.