Covid-19 vangin mi 294 an thi tawh

Nimin khan tlai dar 5 thlengin Covid-19 vangin mi panga an thi a, September 25, Inrinni khan mi pahnih leh September 24 Zirtawpni zan khan mi pakhat an thi bawk. Sorkar chhinchhiah angin, nimin tlai dar 5 thleng khan Mizoramah Covid-19 vangin mi 294 an thi tawh a, September thla bikah mi 77 an thi tawh.

September 23, Ningani zan dar 11:25 khan hripui vangin A Laldingliana (78), Ramthar Veng, Aizawl chu an inah a thi a, Covid-19 positive a ni tih September 15 khan hmuh chhuah niin, an inah an inenkawl a, natna dang nei sa a ni. A thih thu hi September 25, Inrinni khan sorkar thuchhuakah tarlan a ni a, "Report dawn tlai a nih avangin post tlai a ni," an ti. Heti hian September 23 hian hripui vangin mi 11 an thi a, hripui vanga thi an tam ber ní a ni.

September 24, Zirtawpni zan dar 8:35 khan Lalṭhasangi (41), Sawleng chu hripui vangin State Referral Hospital (ZMC)-ah a thi. Covid-19 vei a ni tih September 21-ah hmuh chhuah niin, SRH-ah dah luh nghal a ni a, natna dang nei sa a nih thu sorkar thuchhuakin a tarlang.

September 25, Inrinni chawhma dar 11 khan A Biakchungnunga (71), Lawngtlai-III chu Lawngtlai DCHC (district hospital)-ah a thi a; hripui vei a ni tih September 21-ah hmuh chhuah a ni. Inrinni vêk zan dar 9:15-ah Rosiama (82), Zemabawk pawh SRH-ah a thi a; Covid-19 vei a ni tih September 21-ah hmuh chhuah niin, SRH-ah enkawl nghal a ni. Inrinnia thite hi natna dang nei sa ve ve an ni.

Inrinni zan zanlai pelh hnu, nimin zing dar 1 khan C Romawia (70), Lunglei Rahsi Veng chu hripui vangin Pûkpui DCHC-ah a thi. Thaw-hah nasa a nih avangin September 25 khan an inentir a, a swab sample endikah Covid-19 positive a ni tih hmuh chhuah niin, Pukpui DCHC-ah dah luh nghal a ni a, hripui a vei tih finfiah a nih hnu lawkah a thi a ni.

Nimin zing dar 5 khan F Liansiama (62), Upper Republic a thi a, Covid-19 positive a ni tih August 22-ah hmuh chhuah niin, August 28 aṭangin SRH-ZMC-ah enkawl a ni. B Ramena (83), Luangmual, Aizawl pawh chawhma dar 10:30-ah SRH-ah a thi a, Covid-19 vei a ni tih September 5 khan hmuh chhuah niin, SRH-ZMC-ah dah luh nghal a ni.

Lalsawmi (86), Tlangnuam, Aizawl chu nimin chhun dar 12 khan SRH-ah a thi a; Covid-19 positive a ni tih September 20 khan hmuh chhuah niin, SRH-ah enkawl nghal a ni. Laino (74), Siahatla-I pawh nimin tlai dar 3:30 khan a thi a, hripui vanga thi 294-na a ni. Covid-19 vei a ni tih September 17-ah hmuh chhuah niin, Siaha DCHC-ah enkawl nghal a ni a, nimin khan SRH panpui niin, kawng lakah a thi a ni. Nimina thite hi natna dang nei sa an nih thu sorkar thuchhuakin a tarlang.