Youth Summit & Road Show neih a ni ; Mizoram Land of Opportunity a nihna hi Mizo ṭhalaite'n hmang ṭangkai se - Lalsawta

Mizoram Youth Commission (MYC) chuan nimin khan Assembly Annexe building-ah Youth Summit & Road Show an buatsaih ṭan a, Finance minister Lalsawta'n a hawng. Lalsawta chuan, Mizoram chu eizawnna kawngah remchanna nei ṭha, Land of Opportunity a nih thu sawiin, Land of Opportunity a nihna chu Mizo ṭhalaite'n hmang ṭangkai se a duh thu a sawi.

Finance Minister chuan, Pathianin Mizo­ram a siam dan chu a namailo hle tih sawiin, sik leh sa a nuam a, a mi chengte pawh an

ṭha tih a sawi a, "Kan ṭhalaiten eng nge an tih dawn an tih erawh ngaihtuah a ngai. Land of Opportunity-ah kan chêng a, chumi chu a hmang ṭangkaitu kan nih a ngai. Karimganj tlangvalte'n kan ram hi Land of Opportunity atan an hmang ṭangkai rei ta. Karimganj tlangvalte tan mai ni lo a, kan Mizo ṭhalaite tan Land of Opportunity-ah i siam ang u," a ti.

Mizo ṭhalaite'n rilru an siam thar a ngai hle tih sawiin Lalsawta chuan, "Kan ramah hian eizawnna tur kawng tam tak a awm. He Summit aṭang hian ṭhalaite'n ngaihtuahna thar an neih phah ka beisei," a ti a; tih tak zeta beih chuan eng kawngah pawh eizawnna tling a awm vek thu a sawi.

Minister Lalsawta chuan, Mizote zingah pawl anga thawhnaah hna thawh zah a awm ngai lo a, luikawr rimchhe tak tak pawh an hai fai zung zung ṭhin tih a sawi rualin, chhungkaw buhfai leina tur a nih erawh chuan pawl anga an thawh hreh loh tam tak chu an thawk zak leh si tih a sawi a, "A pawi hle a ni. Zahthlak a awm a nih chuan, hna thawh peih loh tluka zahthlak a awm lo," a ti.

MYC chairman Joseph Lalhimpuia, MLA pawhin thu sawiin, "Ṭhalaite khawvel kan tihah hian khawiah nge Mizo ṭhalaite kan awm? Mobile phone changkang tak tak kan hmang a, social media-ah kan râk vak vak a, hnam dangte hna thawh ang thawk tur kan awm lo," a ti a; Mizorama kawngpui siam turin sorkar hotute'n Mizo ṭhalaite thawk tur an hmu zo lo a, Jharkhand velah hna thawk tur an zawng ṭhin niin a sawi.

Joseph Lalhimpuia chuan, Mizo ṭhalaite ngaihsan tur Mizo ṭhalai, an hmazawna tumruh leh hlawhtlingte zawn an tum a, chu'ng mite hnenah chuan Young Achiever Award hlan an tum thu a sawi a; all India level exam-a tiṭhate hnenah an exam leh zelna atana puih nan MYC-in cheng nuai 30/40 vel a pek chhuah dawn thu a sawi bawk.

Youth Summit & Road Show hmasa berah hian photo exhibition, painting exhibition, career & skill development, music & film making, food court leh free counselling-te buatsaih a ni a, vawiinah chhunzawma zawh a ni ang.

A hawnna inkhawmah hian School Education minister H Rohluna, MLA Hmingdailova Khiangte, Planning secretary Dr C Vanlalramsanga leh zirlai ṭhahnem tak an tel a ni.