Kumin academic session-ah MIMER-ah zirna ṭan a nih theihna atan hma kan la - Health Minister

Mizoram Institute of Medical Education and Research (MIMER) Core Committee chu April 16, Thawhṭanni tlai khan Health minister Lal Thanzara hoin Chief Minister's Office conference hall-ah an ṭhu a, Mizorama medical college hmasa ber tur dinna tur hmalaknate an thlirho. Health Minister chuan, kumin academic session-ah MBBS zirna ṭan a nih ngei theihna atan hma an lak thu a sawi.

Lal Thanzara chuan, academic asession 2018-19 chhunga MBBS course ṭan a nih ngei theihna atan sorkar leh department-in thâ thlah loa hma an lak mek thu sawiin, "Chuti chung chuan hmabak kan la nei. Kan hmabakte hi a rang thei ang bera zawh tumin kan bei mek a, beiseina pawh kan nei sang hle a ni," a ti.

Department-a mawh­phurtute'n chawlh pawh sawi loin a ṭul ṭul an dâwr zel tih sawiin Lal Thanzara chuan, "Chumi rah chu MIMER-ah a lang mek a, mahse, a rah kan ngahhlelh em em chu kumin ngeia MBBS course kan ṭan theih hi a ni," a ti a; Medical Coun­cil of India (MCI) report chu confidential a nih angin, engtin nge MIMER chungchang an ziah hriat a ni lo a, mahse, a hma aia dinhmun ṭhaa an awma a hriat thu a sawi.

Health Minister chuan, MCI duh dan eng­emaw chen an tlin tawha a hriat thu sawiin, "Zir­tirtu lamah an tehfung kan la tling lo deuh a ni âwm a, hengte hi kan tlin ngei nan chak takin kan bawhzui mek a, kan tlin ngei pawh kan beisei. Union Health Minister hnenah kar hmasaah ziakin ka thlen bakah telephone-in ka bia a, a theih anga min puih a tiam a ni," a ti.

MIMER principal-cum-dean Prof. L Fimate leh MIMER nodal officer Dr Jane Ralte ten kar hmasa lama New Delhi-a mi pawimawh an hmuh chanchin sawiin, hmalak tawhna leh hmabak la awmte meeting-ah an tarlang a, sawiho a ni.

Meeting-a tarlan danin, medical college din tura phalna petu MCI Inspec­tion Team-in 2017 kum tawp lamah MIMER an endik a, April 4, 2018-ah an endik leh bawk. Inspection team-in an hmuh dante chu MCI-ah an thehlut tawh a, an report behchhanin MIMER din leh din loh turah thutlukna a siam ang.

MPSC chuan MIMER-a zirtirtu lakna atan a vawi khatna atan Mizoram pawn, Guwa­hati-ah interview an buatsaih a, mi eng emaw zat an la fel tawh. Faculty lak tharte bakah, MCI tehfunga college faculty ni thei department-a thawk mek Mizo doctor eng emaw zat chu depu­tation-in MIMER-ah dah tawh an ni.