District pek phûtin Darlawnah kawng an zawh

Darlawn leh a chheh­vel khaw mipuite chuan, Darlawn district head­quarters pek phûtin nimin khan Darlawnah kawng an zawh a; resolution siam­in, sorkara thlen turin Darlawn BDO H Zonun­mawia hnenah an thehlut.

Kawngzawh hi Dar­lawn District Demand Comiittee huaihawt a ni a, Darlawn mipui bakah, Darlawn chhehvel khaw mipuite nen mi 3,000 chuang an tel niin an sawi. Nimina kawngzawh hi Darlawn district siam phutna atana kawng an zawh vawi thumna a ni.

Kawngzawh hi Darlawn Veng­hlun V/C president C Lalchawi­mawia'n a kaihruai a, bul an ṭannaah Darlawn bial pastor Rev. Johana'n hunserh a hmang.

Hmun pathumah dingin, DDDC chairman JMS Dawngliana, Darlawn Vengpui V/C president Lalsangzela Ren­thlei leh, Darlawn Chhimveng V/C president Ngur­nunpari Sailo ten thu an sawi.

Kawng zawhte chu 'Mizoram sorkar hian district thar min pe rawh se' tih te, 'Sorkar hian demand area hmasawn nan district thar min pe rawh se' tih te, district thar danga beh kan duh lo' tihte leh, 'District kan hmuh hma loh chuan kan kal zel dawn,' tihtein au rual a ni.

Darlawn kawng zawha resolution
1. Mizoram chhung khua leh tlangdung hrang hrangte'n hmasawnna rahbi thar an chuankai mek lai hian, kan tlangdung erawh hmasawnna lian tham hmuh tur a váng hle. Hmasawnna rahbi thar kan chuankai vena tura pawimawh ber district thar hi kan sorkar hian min pe ngei rawh se.
2. Kan tlangdung hi state pahnih Assam leh Manipur nen inrîin, a bik takin security-ah thuam chak kan ngai hle. Hei vang hian kan tlangdunga mipuite thlamuang leh him taka kan chen theih nan kan sorkar chak tak hian district administration thar kan tlangdung tan min pe ngei rawh se.
3. Kan demand area khaw 41-te hi district thar danga beh kan duh lo a, district administration thar hi min ngei rawh se. Heng kan sawi hrang hrangte hi Election Code of Conduct-in a phuar hma ngeiin kan sorkar hian min pe rawh se.