KHAWTHLIR

Target khûm
Excise & Narcotics department chuan sorkar kum liam ta, 2017-18 chhung khan cheng nuai 6,568.58 an hmu a, an target cheng nuai 5150 chu an khûm. Excise & Narcotics sum hmuh tamna ber chu sap zu aṭangin a ni a, zu chhiah aṭangin cheng nuai 6,357.82 an hmu. Fine aṭangin cheng nuai 1.63 hmuin, thil dang hrang hrang aṭangin cheng nuai 209.12 an hmu a, a vaiin cheng nuai 6,568.58 an hmu a ni.

Thisen pe
Sesawng Bial KṬP ­chuan nimin khan Sesawng Hohran Hall-ah blood donation camp an huaihawt a, KṬP member mipa 18 leh hmei­chhia pathumin Aizawl Civil Hospital tan thisen unit 21 an pe.

Book Award
Mizo Writers Association chuan, kum 2017 chhunga Mizo ṭawnga lehkhabu lehlin ṭha zual top 3 an thlang chhuak a, chungte chu Lalzapara lehlin 'I thiltumte a tak ram thlenpui rawh', R Lalfakawma lehlin 'Kristiante hriat chak' tih leh Lalzarzova Khiangte lehlin 'The Black Panther of Sivanipalli' tihte an ni.

MADC V/C inthlan
Nimin khan Mara Autonomous District Council (MADC) huam chhungah (Siaha district) village council inthlanpui neih a ni. Inthlanah hian zing dar 7 aṭanga tlai dar 5 thleng vote thlak hun hawn a ni a, vote thlak zawh veleh vote tlate chhiar nghal a ni. Inthlan result hi he thu ziah lai hian hriat theih a la ni lo. Siaha district-ah hian V/C 92 a awm a, V/C seat 512 awmin, candidate 910 an awm a ni.

Chawlhah puang
April 20, 2018-ah Chakma Autonomous District Council (CADC) inthlanpui neih a ni dawn a, CADC chhunga chengte'n ṭha taka vote an thlak theih nan Governor Lt.Gen. Nirbhay Sharma chuan vote thlak theih ní, April 20 chu Chakma Autonomous District Council chhung bik tan chawlhah a puang.