Politics hi rinthu leh dâwt sawia Intihlenna tur a ni lo - Lal Thanhawla
Congress party president Lal Thanhawla chuan nimin khan Chawngte (C)-a Congress Bhavan-ah thu a sawi a; politics chu rinthu leh dâwt sawia intihlenna tur a nih loh thu a sawi.
Lal Thanhawla chuan politics chu ei leh bar, khawtlang leh kohhran nghawng a nih thu sawiin, "Politics hi rinthu leh dâwt sawia intihlenna tur a ni lo. Mahni chhia leh ṭha hriatna nen Pathian ráwn chunga kalpui chi a ni," a ti a; politics-ah tute nge dâwt sawi ṭhin finfiah fo ṭhin turin mipui a chah.
MPCC President chuan, 'Chakma Autonomous District Council (CADC) ṭhiah hi ka hna hmasa ber a ni ang,' tia Chief Minister a nih hlima chanchinbumite hnena sawituin, 'Chakma pakhatmah candidate ka dah lo ang' tih a puang leh tawh niin a sawi a, "Chakma candidate eng zat nge an rawn puan le?" a ti.
MNF hotupain hman ni lawkah CADC inthlan atana a campaign-naah Chakma-te chu Chakma Vibrant Nation-ah ka siam dawn che u, tia a sawi thu sawiin Lal Thanhawla chuan, "Tu fa mahin India hnuaiah vibrant nation a siam thei lo," a ti a; Zoramthanga thil sawi chu pawi a tih thu a sawi.
MPCC President chuan, Congress party policy, NLUP chu a ṭhat em avangin party dangin an hêk an hêk ṭhin nia sawiin, "MNF MLA-te'n NLUP sem kawngah tel ve an duh a, sorkarin tihlawhchham tumtute hnenah a pe thiang lo. Tunah an lo hêk leh a, mahse, a tawp dawn lo, November-ah kan inthlang ang a, sorkar tharah pawh nasa zawkin kan chhunzawm zel ang," a ti.