Ṭhál chhunga thingsai kawng siam an phût

Mizo Students’ Union (MSU) sub-headquarters, Thingsai chuan thuchhuah siamin, Thingsai khaw kawng enkawltu BRTF-in kawng siam tura January 2013 aṭanga hma an la la lo chu hriatthiam har an tih thu leh an dem thu an tarlang a, "A rang thei ang bera tun ṭhál chhung ngeia hma la nghal turin kan ngen a ni," an ti.

Thingsai MSU chuan, an khua chu Mizorama khaw upa leh hlun ber a ni a, kum 1884-ah din a nih thu leh kum 1984-ah tuna chief minister Lal Thanhawla hoin Thingsai centenary an lawm tawh thu an sawi a; khaw upa ber an ni chungin Thingsai-Cherhlun inkar kawng chu fûr laiin a diakin a chhe thei hle tih sawiin, kawng enkawl hna chu PWD aṭangin BRO/BRTF-in January 16, 2013-ah an lak thu an tarlang.

Thingsai-Cherhlun kawng chu BRO/BRTF-in an lak aṭanga kum nga a liam hnuah pawh kawng siam tura hmalakna a la awm lo tih sawiin Thingsai MSU chuan, "Thingsai mipui kan mangang tak zet a, Thingsai mipui­in pawisa thawh khawmin, tuna boulder phah turin hna kalpui mek a ni. BRO/BRTF-in ramri bul inkalpawhna a ngai pawimawh lo hi hriatthiam har kan ti hle," an ti.

Thingpui mipui harsatna chu hriatsak a, a ṭul anga hma laksak turin Mizoram sorkar an ngen bawk.