Nupui thattu dam chhung táng turin ti

Aizawl District Court-a additional district & sessions judge Dr HTC Lalrinchhana chuan, Vanlalsiami (45) thattu a pasal Vanlalhlua, Bawngkawn chu thiam loh a chantir a, dam chhunga táng tur leh Rs. 50,000 chawi turin a hrem.

Court judgement-a a lan danin, July 4, 2014 zing dar 9 velah Bawngkawn Brigade huam chhungah hmeichhe ruang chhar a ni a, a hrawka zaina hnûhmá a awm. Hmeichhia chu Vanlalsiami w/o Vanlalhlua, Bawngkawn a ni tih hriat a ni a, rinhlelh thilah a pasal leh a pasal nau mipa chu thu zawhfiah turin police-in an man a ni.

Police hnu chhuina leh thuhretu hrang hrangte thusawi aṭangin Court chuan Vanlalsiami thihnaah a pasal Vanlalhlua chu mawhphurtu ni ngeiah a ngai a, thiam loh a chantir ta a ni. Vanlalhlua nau erawh chu a inhnamhnawih loa ngaih a ni thung.

Court chuan tun hnai khan Vanlalhlua chu dam chhunga táng tur leh Rs. 50,000 chawi turin a hrem a; pawisa a chawi loh chuan thla 6 dang tàn belh turin a ti bawk.