Mizoram Liquor Prohibition Rules peih a ni tawh

Excise & Narcotics department (END) chuan nimin khan an minister Dr K Beichhua hoin a pisaah an hmalaknate an thlirho a; Mizoram Liquor Prohibition (MLP) Rules peih a nih tawh thu tarlan a ni.

Dr K Beichhua chuan, MLP Rules tih chhuah a la nih loh chungchang sawifiahin, "Rules siam fel vek tawh a ni. Covid-19 avangin hun khirh tak kan tawn mek karah Cabinet meeting koh zung zung a harsa a, hei vang hian by-circulation-a tih mai ni se tiin kan rêl a ni," a ti.

END Minister chuan, mawhphurhna ṭha taka hlen a nihin mahni mai bakah, tu leh fate tan khawvel nuam siamtu an ni tih hriat reng a pawimawh tih sawiin, "Ram tana thil ṭha hnutchhiahtute hi mi tam tak an ni ngai lo," a ti a; END pawh quantity aia quality zawnga ke pên tur an nih thu a sawi.

Ṭhutkhawmah hian, Krismas leh kumthar vuakvêta zu leh ruihhlo hluar chho leh thei chungchang an sawiho a; END-in Mizoram puma beihpui a thlak dan tur chu END Secretary hoa rêl turin an dah.

END hian kumin March 22 aṭanga November 25 thlengin rakzu litre 28,733.559, zu siamna bél 1,715, dàwidim kg. 147, sap zu ûm puitling 3,385, ûm chanve 84, beer can lian 3,259 leh a can tê 62 an man a ni.