Congress-in CADC Fultuli bial buaina an sawifiah 'High Court-in MNF candidate hnâwlna a stay tel lo'

Congress party Media department hotute chuan, Chakma Autonomous District Council (CADC) inthlan tura Fultuli biala candidate-te chungchanga Gauhati Hight Court-in stay order a chhuah chuan returning officer (R.O) N Chakhai-a'n INC candidate Kali Kumar Tongchongya tlinga a puanna, Certificate of Election chiah a 'stay' a, R.O-in MNF candidate Sumir Tongchangya nomination a hnâwlna Certificate of Scrutiny a stay tel lo niin an sawi.

MPCC media department hotute hian nimin khan Aizawl Press Club-ah thuthar thehdarhtute an kâwm a; April 20, Zirtawpnia CADC inthlan tura Fultuli biala Indian National Congress (INC) candidate leh MNF candidate-te chungchanga High Court-a thubuai awm mek chungchang an sawifiah a ni.

MPCC Media chairman James Thang­hmingmawia sawi danin, CADC inthlan turah hian Fultuli biala chuh turin MNF candidate Sumir Tongchangya-a'n April 4-ah nomination a file a, R.O-in April 5-ah a endik a; MNF candidate-in amah thlawptu (proposer/seconder) atana a hman chu CADC-a thawk a nih avangin R.O chuan MNF candidate chu a hnâwl (disqualify) a ni.

R.O chuan Fultuli bialah INC candidate Kali Kumar Tongchangya chiah a awm tak avangin, CADC (Constitution, Conduct of Business, etc.) Rules, 2002 CADC CCB Rules)-a Rule 181(4) tlawhchhanin Kali Kumar Tongchangya chu chuhtu awm loin tlingah a puang a; April 6-ah Certificate of Election a tichhuak.

James Thanghmingmawia hian R.O-in MNF candidate a hnâwlnaa dan tlawhchhan a tarlan chu, CADC CCB Rules-a Rule 153 a ni. Chutih laiin, High Court order-a thubuai thehluttu lamin dan an tlawhchhan chu CADC CCB Rules-a Rule 151(3) a ni thung.

Thubuai thehluttu lamin CADC CCB Rules-a Rule 151(3)-ah CADC inthlana candi­date-te proposer/seconder ni turin sorkar hna­thawkte hman theih a ni lo tih tarlan a ni loh thu an sawi chungchanga zawhna chhangin, James Thanghmingmawia chuan, "Sorkar hnathawkte hman theih a ni lo tih specific tak chuan a inziak lo, tinzâwn theih chuan a awm. R.O thu a nihna chen a awm," a ti.

R.O-in a nomination a hnâwl avangin MNF candidate Sumir Tongchangya chuan Gauhati High Court, Aizawl Bench-ah April 10-ah Writ Petition [WP(C) No. 42 of 2018] a thehlut tih sawiin Thanghmingmawia chuan, High Court hian April 10-ah vêk order a siam a, Congress party candidate Kali Kumar Tongchangya tlinga puan a nihna Certificate of Election chu a stay lailâwk rih ta niin a sawi.

James Thanghmingmawia chuan, High Court-in a stay tak chu R.O-in Kali Kumar Tongchongya tlinga puanna Certificate of Election chauh a nia sawiin, "MNF candidate nomination a hnâwlna Certificate of Scrutiny a stay tel lo a, hei vang hian, High Court-in thutlukna a siam hunah pawh Fultuli bialah Kali Kumar Tongchongya nomination chauh a nung dawn tho a ni," a ti.

High Court-in order a chhuah lai hian thiamthu sawi turin Kali Kumar Tongchongya emaw, R.O N Chakhai emaw koh hman an ni lo tih sawiin Thanghmingmawia chuan, "Pu Kali Kumar Tongchangya hian stay order hi ṭhiah (vacate) a dil thei ang tih chiang takin High Court order-ah ziah a ni," a ti a; hei vang hian, April 23-a High Court, Aizawl Bench a inhawn leh veleh Kali Kumar Tongchangya chuan stay order chu ṭhiah a dil ve nghal dawn niin a sawi.