Measles-Rubella vaccination campaign ṭan a ni

Sentut beihpui thlakna, Measles-Rubella (MR) Vaccination Campaign chu nimin khan Aizawl leh disrtrict dang parukah ṭan a ni a; Aizawlah chuan campaign hi Mizo High School auditorium-ah Health minister Lal Thanzara'n a hawng.

MR vaccination campaign hawnna inkhawm National Health Mission (NHM) mission director Dr Lalrozama'n a kaihruai a; Health Minister chuan, campaign-in a tum ber chu naute thla 9 mi aṭanga tleirawl kum 15 inkar zawng zawngte MR hri danna pek vek a nih thu a sawi a, "Kum 2020-ah chuan sentût ûmbo vek a, rubella natna leh a kaihhnawih Congenital Rubella Syndrome (CRS) khuahkhirh tlat a, sentût vanga thihna leh rubella vanga piangsual an awm tawh lohna tura hmalak a ni," a ti.

Lal Thanzara chuan, Mizoramah CRS case pakhat hriat chian a ni tawh tih sawiin, "Thla hmasa lawk khan rubella positive naupang pahnih hriat a ni leh a, heng lo pawh hi awm tura ngaih a ni. Chuvangin, naupang rualbanlo tam tak enkawl mekte pawh rubella vang a ni lo ang tih a sawi theih loh. MR vaccine lo la tawhte tan pawh campaign chhung hian hri danna lak nawn leh vek tur a ni," a ti a; MR vaccine chu naupang tan a hlauhawm lo tih a sawi.

Health Minister chuan, chhung­kua leh khawtlang tana hriselna kawnga harsatna nasa tak thlen theitu natna chu MR vaccine lak vanga fihlim theih a nih thu sawiin, hlauhawm si lo, sum sen ngai loa sorkarin a thlawn liau liaua awlsam taka hri danna lak theiha sorkarin a buatsaih chu vanneihthlak a tih thu a sawi a, "Kan tu leh fate lo laktir hi mi tinin kan tihmâkmawh a ni," a ti.

State immunisation officer Dr Lalzawmi pawhin thu sawiin, "MR vaccination campaign chhung hian Mizoramah naupang 3,75,000 vaccine pek tum a ni. Vaccine pek hmaih palh an lo awm a nih pawhin zawn chhuah leh an ni ang," a ti a; a hun laia hri danna pek loh naupangte chu an inah vaccine pe tura pan tawh loin, vaccine pek theihna hmun an pan a ngai tawh tur thu a sawi.

India leh WHO-SEARO (South East Asia Regional Office) ram hrang hrang ṭangrualte chuan September 2013 khan kum 2020-ah chuan sentût umbo leh, rubella leh a kaihhnawih CRS khuahkhirh tlat an tum thu an lo puang tawh a ni.

Sorkar laipui pawhin nasa taka hma la zuiin, kum 2020-ah chuan sentût umbo a tum a, rubella leh CRS-te pawh khuahkhirh a tum a ni. Campaign hi nimin khan Siaha district tih loh district dang zawngah ṭan a ni a, Siaha district-ah chuan April 16 khan ṭan tawh a ni.