Bank-te hnathawh thlirlet a ni ; Mizoram pumah bank 27 a awm

State Level Bankers' Com­mit­tee (SLBC) Meeting chu nimin khan Secretariat conference hall-ah Finance sec­retary Lalnunmawia Chuaungo hoin an ṭhukhawm. He hunah hian kum 2017-18 third quarter (April-December 2017) thlenga Mizoram chhunga bank-te hnathawh thlirho a ni a, Mizo­ramah bank 27 a awm thu an tarlang.

Meeting-a tarlan danin, December 2017 thleng khan Mizoram chhungah bank 27 a awm a, bank 27-te chu public sector bank 16, private sector bank pariat, regional rural bank (RRB) pakhat leh cooperative bank pahnih a ni. Bank-te hian branch 203 an nei a, chu'ngte chu public sector bank branch 83, private sector bank branch 19, RRB branch 84 leh cooperative bank branch 17 a ni a; bank-te hian automated teller machine (ATM) booth 175 an nei a ni.

Kum 2017-18 third quarter chhungin bank 27-ah hian cheng vbc. 8275.58 dah luh (deposit) a ni a, credit deposit (CD) ratio chu 41.81% a ni. Bank zinga CD ratio nei sang ber chu Induslnd Bank Ltd. niin, 303.19% a nei a, CD ratio nei tlem ber ICICI Bank Ltd. chuan CD ratio 4.74% chiah an nei.

National Rural Livelihood Mission (NRLM) scheme hnuaia self help group 1,049 hnena loan sanction zat chu cheng vbc. 25.68 a ni a, National Urban Livelihood Mission (NULM)-a self employment programme scheme-a loan sanction chu cheng vbc. 5.33 a ni. Housing loan mi 17,417 hnenah cheng vbc. 966.70 leh education loan mi 487 hnenah cheng vbc. 15.75 pek a ni bawk.