Ran endikna leh zawrhna hmun Sak dan tur chungchang sawiho
Cheng nuai 260.83 senga Champhai Ruantlanga ran endikna leh zawrhna hmun tur, Live Animal Market sak dan tur nimin khan Champhai DC Vanlalngaihsaka hoin DC conference hall-ah sawiho a ni.
Meeting chuan, Mizoram sorkar hmalaknaa Champhaia Live Animal Market din a ni tur chu lawmawm an ti a, district dinhmun leh awm dante en a, a taka hman a nih ngei theih nana hmalak an rêl a, "Ennawn ngai leh her danglam ngaite uluk taka zirchian leh hnuah siam ṭhat ni se. Management leh monitoring-te pawh ṭha taka tih ni se," an ti.
Meeting-a tarlan danin, Champhai hi international border area a nih avangin natna ven kawngah ran lut leh chhuakte uluk taka endik a nih a, ran hrisel leh pangngaite chauh zawrh a pawimawh a; sorkar phal loh ran lak luh dan a ni thei dawn a, sorkarah chhiah felfai taka pek a ni thei dawn bawka ngaih a ni.
Ruahman dan chuan, Live Animal Market-ah hian ran hriselna endik ṭhin a ni ang a, a hriselte chauh zawrh chhuah tura soundness certificate pek ṭhin a ni ang. Ran hriselte chu a hmunah zawrha lei chhuah theih a ni dawn a, ran thite hâl ralna tur leh damlote enfiahna tur laboratory-te pawh bun a ni ang.
Live Animal Market sak nan cheng nuai 260.83 ruahman a ni a, NABARD aṭangin cheng nuai 246.493 leh Mizoram sorkar aṭangin cheng nuai 14.346 hmuh tur a ni. Project hi kum 2017-2019 chhunga thawh tura ruahman a ni.