Lunglei MSU-in ‘MSU Award 2018’ an sem

Zirlai leh ṭhalaite chona leh fuih tharna atan Lunglei MSU chuan kawng hrang hranga entawn tlak mi panga leh pawl pakhatte chawimawina ‘MSU Award 2018’ hlanna hun Lunglei Convention Centre-ah an buatsaih.

Award sem inkhawm hi Lunglei MSU president Biaksiamtluanga'n kaihruaiin, an hun hmanpuitu Lunglei DIPRO C Lalremruati chuan MSU Award 2018 chawimawina dawngtute aṭangin zirtur tamtak a awm thu sawiin, "An taimakna leh tumruhna, teirei peihna, mahni inrintawkna leh an chhelna te hi kan entawn a ngai a ni," a ti a, zirlaite chu hna thawh hreh leh thawh zah nei lo tuin a chah.

Khualzahawm Lunglei MJA president H Lalthansanga chuan mahni insengsoa MSU-ten chawimawi tlak an chawimawi chu midangte ti phurtu a nih a rin thu sawiin, zirlaite chu ram nghahfak an nih angin theihtawp chhuah a mahni intodelh nan thawh hreh nei lo turin a fuih.

Lunglei MSU-in an chawimawite :
• Kawlziki, Sertlangpui khua, Mizo nu zinga fa hring tam ber ni a hriat niin fa 20 lai mai Pathian malsawmna in a nei a ni.
• Chhuanmawia, Haulawng khua, khawl chi hrang hrang mahni irawm chhuak a siam ṭhinin la hlumna khawl, puantahna khawl, chhawhchhi hrual mumna khawl, changel channa khawlte a siam chhuak a ni.
• H Lalṭanpuia, Electric Veng, MSc Botany niin mahni intodelh tuma vawk za chuang a vulh a ni.
• Joseph H Thanzuala, kuthnathawktute tana a hun pumpui petu
• H Laldinmawia, Zohnuai Lungleia Sahbawn siamna hmunpui dintu. Lushai Soap Industry dinin tunah hian eizawn nan an hmang mek a ni.
• Lunglei Town Mutia Association, kum 1994 khan din niin member 42 an nei mek a, hnam dang tel miah loa bungraw thiar leh sem hnathawktute an ni.