Mizoram leh Assam thu a inhmu lo Ramri enfiahna chawlhsan rih a ni
Sorkar laipuia Ministry of Home Affairs (MHA)-in Mizoram leh Assam ramri leh Inner Line Reserved Forest (ILRF) chhung enfiah tura a din Joint Verification team-te chu April 18, Nilaini khan Phaisen hnaih lam ramri endik turin an kal khawm a; mahse, Mizoram leh Assam official-te thu a inhmuh theih loh avangin endik a ni lo. Hemi chungchangah hian Mizoram sorkar official-te chu vawiin hian Home secretary Lalnunmawia Chuaungo hoin Secretariat conference hall-ah an ṭhukhawm dawn.
Joint Verification team-a Mizoram aṭanga telte hnen aṭanga thu dawn danin, Mizoram leh Assam ramri leh ILRF chhunga dan loa thil tih leh hnathawh a awm leh awm loh April 18-a enfiah ṭanna (starting point) atana ruahman Phaisena IR post-ah kal khawm tur a ni. Mizoram lam aiawhte chu zing dar 9-ah an thleng kim vek a, Assam lam aiawhte erawh chu chawhma dar 10 velah an thleng chauh thung.
Enfiahnaah hian team hrang hranga insiamin, starting point aṭanga ṭanin, Mizoram lam leh Assam lamah inṭhena endik hna thawh tura ruahman a ni. Starting point-ah hian Mizoram aiawhte'n Bairabi Zophai lam enfiahnaa an lo tih tawh dan zulzuia an ruahmannate an sawi a, mahse, Assam lamin an pawm thei lo.
Mizoram lamin starting point-a Phaisen IR Post hman an rawt chu Assam lamin an duh lo a, Assam lam chuan an ram china an ngaih (Mizoramin Mizoram china a ngaih vek bawk) Chhimluang/Zukbual lui, Bilkhawthlir aṭanga Buhchang pêng bul lui aṭanga neih a, IR Post thleng endik an duh thung.
Starting point tur leh endik dan turah rei tak an inbiak hnuah pawh thu a inhmu thei lo. Mizoram official-te chuan Assam official-te thil tum dan chu lungawithlak loha an ngaih avangin, enfiah hna chu April 18 atan bik chuan ṭhulh phawt a, thuneitu sang lamah thlen leh phawt te, starting point leh khawi chin nge endik tur tih ruahman tura thuneitu sanga thlen an rawt a, chu chu Assam official-te'n an pawm a ni.
Mizoram leh Assam official-te chuan ramri endik hna chu thuneitu sang aṭanga ruahmanna thar a awm phawt loh chuan chawlhsan rih an tithlu ta a; Vairengte lam hnaih ramri endik hun tur pawh thuneitu sang lam thu nghah law law an remti tlang a ni.
Mizoram official-te chuan, Mizote'n ILRF area chungchang an ngaih pawimawh viau laiin, Assam lam chu an chiang lo hle niin an sawi a, "Inner line chhunga awm Bûkvannei, Saihapui leh Phaisen-te endik vek an rawt a, Buhchang bul Sazuklui hi ramri-ah an lo ngai nghet viau mai a lo ni a. Keini lamin Mizorama khaw pathum leh Dolchhora lamaa khaw 11, inner line chhunga awmte enfiah tel vek kan han rawt a, an hnual leh si a. 'ILRF awmzia zir chiang leh phawt teh u,' tiin kan rawn inthlah a ni," an ti.
Bairabi lama verification neih ṭumah Assam lamin an ram china an ngaih hlir enfiah a ni a, Mizoram lama an ngaihah spot verification neih a nih ve loh avangin Assam official-te an lungawi lo niin Mizoram official-te chuan an hria a ni.
Mizoram lam enfiah ve loh chhan hi Assam official-te chuan ziaka sawifiah turin an phût a; chu chu chhángin Mizoram official-te chuan, Mizorama an ngaih chin chu ILRF-in a huam loh thuin an chháng.
Mizoram-Assam ramri leh ILRF chungchang sawiho tur hian Home secretary Lalnunmawia Chuaungo hoin vawiin hian meeting neih a ni dawn a; he hunah hian ramri enfiahnaa tel sorkar official-te leh MZP aiawhte tel tura tih an ni. Meeting-ah hian ramri chungchang bakah, Bru lak let dan tur leh Mizo lalte'n zangnadawmna an phût chungchang ngaihtuah a ni bawk ang.