Zirtirtu mahni post-a awm duh lo an hna aṭanga bân an awm - H Rohluna

Mizoram RMSA Employee Welfare Association (MIREWA) chuan nimin khan Synod Conference Centre-ah inkhawmpui an hmang a; khuallian, School Education minister H Rohluna chuan, zirtirtu, mahni post-a awm duh lohte zingah bân an awm thu a sawi.

MIREWA inkhawm­pui hi an president R Lal­nunhlima'n a kaihruai a; H Rohluna chuan, RMSA hnuaia zirtirtu leh hna thawk dangte zirna lamah an ṭhahnemngaihna chu lawmawm a tih thu sawiin, "A theih chin chinah anmahni hamṭhatna awm thei dan tur angin sorkar pawhin hmalak zel a duh a ni," a ti.

School Education Mi­nister chuan, zirna a pawimawh avangin sorkarin a ṭha thei ang berin kalpui a tum zel tih sawiin, "Zirtirtu mahni post-a awm ṭha duh lote chu sorkarin a hrem a, bàn mekte pawh an awm a ni," a ti a; zirtirtu mawhphurhna hlen chhuah chu an rawngbawlna pui ber a ni tih hre reng turin zirtirtute a chah.

Ram pum huapa zirna kalpui dan her danglam tumin sorkar laipui chuan RMSA, SSA leh Teacher’s Education (TE) te chu hmun khatah khungin ‘Samagra Shiksha Abhiyan’ tiin a vuah tih sawiin H Rohluna chuan, "Hei hian eng emaw chen chu zirna kalphung leh inrelbawl danah nghawng a neih rin a ni," a ti.

Conference-a an tarlan danin, Mizoram RMSA sikul 92 a awm a, RMSA-ah thawktu mi 742 awmin, an zinga 598 chu zirtirtu an ni. RMSA leh adhoc school inbawhthuah/sikul khata awm ṭhinte chu tihhran a ni.

RMSA sikula thawk tura lak ni si, hmun danga pawhpên leh dah (attached) an awm avangin thawktu indaih lohna an tâwk a, chu'ngte chu an post dik taka an kîr leh theih nan MIREWA chuan hma an la a ni.