CYMA leh AMC-in Hmun rem loa in sak phalna pek sawiho

Aizawl khawpuia a hmun rem lo leh khâm pang, in sakna atana hlauhawma ngaiha Aizawl Municipal Corporation (AMC)-in in sak phalna a pek tawh leh a pek tharte zir chiangtu, Central YMA hnuaia Study Team chuan nimin khan an chairman Lalhmachhuana, CYMA general secretary hoin AMC hotute an kâwm a, an thil hmuh dante an sawipui.

AMC hotute chuan, hmun âwih leh hlauh­awma ngaihte chu Geology & Mineral Resource department-in an zir chian hnua hlauhawm lo leh in sak ngamna nia an hriat chuan in sak phalna an pe ṭhin niin an sawi a, "Khâm pang hlauhawm tak taka ngaihahte GMR department-in hlauhawm loa an ngaih vanga in sak phalna kan pekte chu zir chian zel kan la tum," an ti. Durtlang khâm leh Chaltlang khâm, restricted area-a puan a nih tawh hnuah in sa an awm em tih pawh la zir zel an tum thu an sawi bawk.