German Consul General-in MJA-te an inkâwm
Aizawla châm mek, Kolkata-a German consul general Dr Michael Feiner chuan nimin khan Aizawl Press Club a tlawh a, Mizoram Journalists' Association member-te nen an inkâwm.
German Consul General hi MJA president Zonunsanga Khiangte hoin MJA hruaitute leh member-te'n an lo dawngsawng a; Dr Michael Feiner chuan, Kolkata-ah German Consul General hna thla sarih a chelh tawh thu te, Mizoram chu a vawi khat kalna a nih thu te, vawiina Berawtlanga Magnetic Mizoram - Investors Summit 2018-a tel tura rawn kal a nih thu leh, Mizoram chu nuam a nih thute a sawi.
Dr Michael Feiner-a'n tunlaia Mizorama thil thleng langsar (current issue)-te a zawhna chhangin MJA member-te chuan, Mizoram leh Assam ramria buaina thleng chungchang te, journalism-a Mizo hmeichhiate dinhmun te, Mizorama hriselna dinhmun, a bikin HIV/AIDS chungchang leh vawiina Chakma Autonomous District Council (CADC) inthlan awm tur chungchangte an hrilh.
Mizorama HIV/AIDS darh zel tur vennaah Mizoram tan Germany sorkarin tih theih theih a neih leh neih loh zawhna chhangin Dr Michael Feiner chuan, Germany sorkar leh India sorkarin kawng hrang hrangah thawh dunna an neih mek thu a sawi a; thawh dunnaah chuan HIV/AIDS chungchanga hmalak chu telh ve dan a awm em tih a lo enfiah tur thu leh Mizoram sorkarin a bawhzui theih dante a sawi lang.
MJA hruaitute chuan, Mizoram journalist-te leh India hmarchhaka journalist-te intuaihriamna atan German Consulate-in programme buatsaih thei se an duh thu an lo thlen bawk.
German Consul General hian nimin khan Aizawl Civil Hospital leh Lammuala MFA Grassroots training-te pawh a tlawh a, vawiinah Magnetic Mizoram - Investors Summit 2018-ah a tel ang a, naktukah Kolkata a pan ang.