Court thutlukna tur rinthua sawi lâwk lo turin MNF party-in Congress party-te an chah

MNF Legal Board chair­man J Lalremruata chuan, Chakma Autono­mous District Council (CADC) sorkar pakuanaa Congress MDC-te'n nasa takin sorkar sum an ti­chingpen niin a sawi a; CADC Fultuli biala candidate-te chungchanga High Court-a thubuai chung changah Congress party-te chu Court thu­tlukna tur rinthua sawi lâwk lo turin a chah.

MNF Legal Board Chairman leh MNF ṭha­lai hruaitute chuan nimin khan MNYF President pisaah thuthar thehdarhtute an kâwm a; J Lalremruata chuan, CADC-a Congress sorkarah eirukna a nasat avangin March 22, 2018-ah Governor's Rule puan a ngai hial tih sawiin, an sum tihchingpen dante chhuitir turin MNF senior vice president Tawnluia'n April 11, 2018-ah Governor-ah ngenna a thehlut tih a sawi a, "Governor chuan ngai pawimawhin, hman­hmawh takin Accountant General hnenah chhui nghal turin thu a pe a ni," a ti.

J Lalremruata chuan, CADC Congress sorkar ṭhiah a nih hma lawkin hman­hmawh takin cheng nuai 600 hmanna awm loin chhehrelh a ni tih sawiin, "Sum hi CADC inthlan awm turah campaing nan CADC mipui hnena sem an tum ta mai em ni? Sum dik lo taka hman dan hi hun rei lo têah hai chhuah a ni ngei dawn," a ti a; tuna sum chingpen bakah, CAG report-ah CADC-a Congress sorkarin sum an tihchingpen dan an tarlan nasat thu a sawi.

MNYF vice president Lalremruata Chhangte pawhin, CADC Chief Exe­cutive Member leh exe­cutive member-te'n cheng nuai 280 chuang an tihchingpen tawh thu leh, chu chu CAG report awm leh turah pawh a lan an rin thu a sawi a, "Congress MDC-te hi corruption-ah an inhnamhnawih nasa a, MDC atan thlan nawn leh chi-ah kan ngai lo," a ti.

MNF Legal Board Chair­man chuan, Cong­ress party mite chu Court rorel dan tur lo sawi lâwk lo tur leh dan chhiar chiang turin a chah a, "CADC CCB Rules-ah 'Any person' tihah khan seconder a tel. Hetiang thilah hian Supreme Court thutlukna a awm tawh a, candidate seconder-in tihdik loh a nei a nih chuan ama'n a tuar tur a ni a, candidate-in a tuar tur a ni lo, tiin thutlukna a lo siam tawh a ni," a ti a; CADC Fultuli bialah inthlanna neih a nih ngei an rin thu leh chu chu democracy kalphung a nih thu a sawi.